![](https://bharatshakti.in/wp-content/uploads/2024/03/LT-BSI-Defence.gif")
काठमांडू ते मनिलापर्यंतच्या तरुण पिढीला भ्रष्टाचार, असमानता आणि राजकीय व्यवस्था आपले भवितव्य बिघडवत आहेत असे वाटल्याने आलेली निराशा व्यक्त करत ते रस्त्यावर उतरताना दिसत आहेत.
नेपाळच्या Gen Z च्या निदर्शनांना जागतिक बातम्यांमध्ये प्रसिद्धी मिळाल्यानंतर अवघ्या काही दिवसांनी रविवारी हजारो फिलिपिनो तरुणांनी पूर नियंत्रण प्रकल्पांमधील भ्रष्टाचाराचा निषेध करण्यासाठी मनिला येथे गर्दी केली. यावेळी जनतेच्या विश्वासाचा घात केल्याचा आरोप करणाऱ्या नेत्यांकडून पारदर्शकता आणि जबाबदारीची मागणी या तरुणांनी केली.
काँग्रेसमध्ये काही आठवड्यांच्या सुनावणीनंतर ही निदर्शने करण्यात आली जिथे अधिकाऱ्यांनी कबूल केले की अब्जावधी डॉलर्स ‘खोट्या’ पायाभूत सुविधा प्रकल्पांवर खर्च केल्याचे दाखवण्यात आले आहे. अध्यक्ष फर्डिनांड मार्कोस ज्युनियर, ज्यांचे वडील 1986 च्या पीपल पॉवर बंडात पदच्युत झाले होते, त्यांनी भ्रष्टाचाराचा मुद्दा हाताळण्याचे आश्वासन दिले होते परंतु त्यांच्या हेतूबद्दल प्रश्नचिन्ह कायम आहे.
21 सप्टेंबर रोजी, दिवंगत हुकूमशहा फर्डिनांड मार्कोस यांनी 1972 मध्ये मार्शल लॉ जाहीर केल्याच्या वर्धापन दिनानिमित्त, हा निषेध मोर्चा आयोजित करण्यात आला होता.
बहुतांश निदर्शने शांततेत झाली असली तरी दुपारी उशिरा मनिला येथील आयला ब्रिज आणि मेंडिओलाजवळ तणाव वाढला. पोलिसांनी वृत्त दिले की, मास्क घातलेल्या तरुणांच्या गटांनी सुरक्षा दलांवर दगडफेक आणि बॉम्ब फेकले, ज्यामुळे अधिकाऱ्यांना त्यांना पांगवण्यास भाग पाडले. अधिकाऱ्यांनी सांगितले की, अल्पवयीन मुलांसह 216 जणांना अटक करण्यात आली असून 93 पोलिस अधिकारी जखमी झाले.
फिलिपिन्स न्यूज एजन्सीच्या वृत्तानुसार, संरक्षण सचिव गिल्बर्टो टिओडोरो ज्युनियर यांनी हा निषेध आता ‘राष्ट्रीय सुरक्षेचा मुद्दा’ असल्याबद्दल चिंता व्यक्त केली. एका रेडिओ मुलाखतीत, टिओडोरो यांनी अद्याप पुष्टी न झालेल्या अहवालांचा हवाला दिला की बेकायदेशीर ड्रग्ज आणि बाहेरील गटांनी काही निदर्शकांना प्रभावित केले असावे, कवटीच्या खुणा असलेले काळे झेंडे बाह्य आंदोलनाचे संभाव्य लक्षण म्हणून वापरल्याकडे लक्ष वेधले.
एजन्सीने असेही वृत्त दिले की काही अधिकाऱ्यांच्या म्हणण्यानुसार स्थानिक दहशतवादी गटांनी मेट्रो मनिला येथे रविवारी झालेल्या भ्रष्टाचारविरोधी रॅलींमध्ये व्यत्यय आणण्याचा प्रयत्न केला असावा, ज्यामुळे सरकारने सुरक्षा कडक केली आणि निदर्शनांमध्ये घुसखोरी झाली का याची चौकशी केली.
या निषेधामुळे कायमस्वरूपी बदल होईल की नाही हे अनिश्चित आहे, परंतु एक गोष्ट स्पष्ट आहे, पुढच्या पिढीचा आवाज अधिकाधिक वाढत आहे आणि तो खऱ्या अर्थाने देशाच्या राजकीय परिदृश्याला आकार देत आहे.
अनुकृती
