![](https://bharatshakti.in/wp-content/uploads/2024/03/LT-BSI-Defence.gif")
पाकिस्तानचे नौदलप्रमुख ॲडमिरल नविद अशरफ, यांनी सांगितले की “चीनद्वारे पाकिस्तानसाठी तयार करण्यात आलेली पहिली पाणबुडी पुढील वर्षी त्यांच्या सेवेत दाखल होईल.”
‘ग्लोबल टाइम्स’ला दिलेल्या मुलाखतीत त्यांनी म्हटले आहे की, “2028 पर्यंत हँगोर-श्रेणीच्या आठ पाणबुड्या (Hangor-class submarines) सुपूर्त करण्याच्या कराराअंतर्गत सुरळीतपणे काम सुरू असून, या पाणबुड्या उत्तर अरबी समुद्र आणि हिंदी महासागरातील पाकिस्तानच्या गस्त क्षमतेत मोठी वाढ करतील.”
पाच अब्ज डॉलर्सचा करार
पाच अब्ज अमेरिकन डॉलर्सच्या या करारानुसार, पहिल्या चार पाणबुड्यांती निर्मिती चीनमध्ये केली जाईल, तर उर्वरित चार पाकिस्तानमध्ये तयार केल्या जातील, ज्यामुळे स्थानिक तांत्रिक क्षमतेतही वाढ होण्यास मदत होईल.
पाकिस्तानने याआधीच, चीनच्या हुबेई प्रांतातील एका शिपयार्डमधून यांग्त्से नदीत तीन पाणबुड्यांचे जलावतरण केले आहे.
“चीनमधील उपकरणे आणि प्रणाली विश्वासार्ह, तांत्रिकदृष्ट्या प्रगत आणि पाकिस्तान नौदलाच्या कार्यात्मक गरजांसाठी अत्यंत अनुरूप ठरल्या आहेत,” असे ॲडमिरल नविद अशरफ यांनी सांगितले. चीनच्या सत्ताधारी कम्युनिस्ट पक्षाचे वृत्तपत्र ‘पीपल्स डेली’ चे उपप्रकाशन असलेल्या ‘ग्लोबल टाइम्स’शी ते बोलत होते.
स्टॉकहोम आंतरराष्ट्रीय शांतता संशोधन संस्था (SIPRI) यांच्या आकडेवारीनुसार, 2020 ते 2024 या काळात पाकिस्तान हा चीनकडून सर्वात मोठ्या प्रमाणावर शस्त्र खरेदी करणारा देश राहिला असून, या काळात त्याने चीनच्या एकूण शस्त्र निर्यातीपैकी 60 टक्क्यांहून अधिक शस्त्रास्त्रांची खरेदी केली आहे.
अब्जावधींची गुंतवणूक आणि विस्तार
अब्जावधी रूपयांच्या शस्त्रास्त्र विक्रीशिवाय, बीजिंगने अरब सागरापर्यंत आपले संपर्क मजबूत करण्यासाठी सुमारे 3,000 किमी (1864.11 माईल्स) लांबीच्या ‘चीन–पाकिस्तान आर्थिक क्वॉरिडॉरमध्ये’ (CPEC) अब्जावधी डॉलर्सची गुंतवणूक केली आहे. ही क्वॉरिडॉर चीनच्या शिनजियांग प्रांतापासून ते पाकिस्तानमधील ग्वादर या खोल पाण्याच्या बंदरापर्यंत जातो.
राष्ट्राध्यक्ष शी जिनपिंग यांच्या ‘बेल्ट अँड रोड उपक्रमाचा (BRI)’ एक भाग असलेली ही मार्गिका, चीनला मध्यपूर्वेतील ऊर्जा आयातीसाठी थेट मार्ग उपलब्ध करून देते, ज्यामुळे मल्लाकाच्या सामुद्रधुनीवरील अवलंबित्व कमी होते.
या उपक्रमामुळे चीनचा प्रभाव अफगाणिस्तान, इराण आणि मध्य आशियापर्यंत विस्तारला आहे. तसेच म्यानमारमधील लष्करी शासनाशी असलेले त्याचे संबंध आणि बांगलादेशशी असलेले सौहार्दपूर्ण संबंध, भारताला धोरणात्मकरीत्या वेढण्याचा प्रयत्न आहे.
दरम्यान, भारताकडे तीन स्वदेशी बनावटीच्या अणुऊर्जेवर चालणाऱ्या पाणबुड्या आहेत. तसेच फ्रान्स, जर्मनी आणि रशिया यांच्या सहकार्याने मिळवलेल्या किंवा विकसित केलेल्या तीन प्रकारच्या डिझेल-इलेक्ट्रिक आक्रमक पाणबुड्याही कार्यरत आहेत.
टीम स्ट्रॅटन्यूज
(रॉयटर्सच्या इनपुट्ससह)
