![](https://bharatshakti.in/wp-content/uploads/2024/03/LT-BSI-Defence.gif")
इस्रायलने एका रशियन नागरिकावर इराणसाठी हेरगिरी केल्याचा आरोप केला असून, ज्यामध्ये इराणच्या गुप्तचर संस्थांच्या निर्देशनानुसार इस्रायलच्या बंदरांचे आणि पायाभूत सुविधांचे छायाचित्रण केल्याचा आरोपांचा समावेश आहे, अशी माहिती इस्रायलचे पोलीस आणि अंतर्गत सुरक्षा संस्थेने शुक्रवारी दिली.
व्हिटाली झ्व्यागिंटसेव्ह नामक हा रशियन नागरिक, इस्रायलमध्ये वर्क परमिटवर राहत होता आणि त्याला डिजिटल चलनाद्वारे पैसे पुरवले जात होते, अशी माहिती पोलीस आणि सुरक्षा संस्थेने एका संयुक्त निवेदनाद्वारे दिली आहे. ऑक्टोबर महिन्याच्या सुरुवातीपासून ते 4 डिसेंबरपर्यंत, जेव्हा रशियन नागरिकाला हवाई दलाच्या तळावर अटक करण्यात आली, तेव्हापासून हे दोघे संपर्कात होते.
‘द टाइम्स ऑफ इस्रायल’नुसार, झ्व्यागिंटसेव्हने कथितपणे इलात, हैफा आणि अशदोद बंदरांची तसेच हर्झलिया मरीनाचे छायाचित्रण केले आणि ती माहिती त्याच्या हँडलरला पाठवली. हैफाच्या काही भागांवर नजर ठेवता येईल अशा उंच ठिकाणी असलेल्या नेशेर पार्कलाही त्याने भेट दिली, जिथे त्याने शहरातील तेल शुद्धीकरण प्रकल्पांचे चित्रीकरण केले.
त्याने लष्करी जहाजांचे छायाचित्रण केले, ज्यामध्ये अमेरिकन नौदलाचे एक सशस्त्र मर्चंट क्रूझर आणि इस्रायली नौदलाच्या डॉल्फिन-क्लास पाणबुडीचा समावेश होता.
फिर्यादींच्या म्हणण्यानुसार, त्याला प्रत्येक कामासाठी शेकडो डॉलर्स इतकी रक्कम क्रिप्टोकरन्सीमध्ये दिली जात असे.
अनेक दशकांपासून इस्रायल आणि इराणमध्ये सुरू असलेले पडद्यामागचे युद्ध, जूनमध्ये थेट युद्धात रूपांतरित झाले, जेव्हा इस्रायलने इराणमधील विविध लक्ष्यांवर हल्ले केले, ज्यामध्ये देशाच्या आत खोलवर तैनात असलेल्या मोसाद कमांडोच्या ऑपरेशनचाही समावेश होता.
इस्रायलने, इराणसाठी हेरगिरी केल्याच्या आरोपावरून डझनभर नागरिकांना अटक केली आहे. रॉयटर्सला मिळालेल्या सूत्रांच्या माहितीनुसार, इस्रायलचा कट्टर शत्रू असलेल्या देशात शिरकाव करण्यासाठी तेहरानचा दशकांतील हा सर्वात मोठा प्रयत्न होता.
इराणी गुप्तचर संस्थांनी, पैशाच्या बदल्यात गुप्तपणे माहिती गोळा करण्यासाठी आणि हल्ले घडवून आणण्यासाठी, सामान्य इस्रायली लोकांची भरती करण्याचे गेल्या काही वर्षांत वारंवार प्रयत्न केले होते, त्यानंतर हे अटकसत्र सुरू झाले.
2024 मध्ये, इराणसाठी हेरगिरी केल्याच्या संशयावरून इस्रायलने ज्यू नागरिकांना अटक केल्यानंतर प्रसारमाध्यमांना पाठवलेल्या निवेदनात, त्यांनी इराणच्या संयुक्त राष्ट्र मिशनने इस्रायलमध्ये लोक भरती करण्याच्या प्रयत्नांना दुजोरा दिला नाही किंवा ते नाकारलेही नाही. मात्र, “तार्किक दृष्टिकोनातून” असे कोणतेही प्रयत्न झाले असतील, तर संशय कमी राहावा यासाठी इराणी गुप्तचर संस्था, गैर-इराणी आणि गैर-मुस्लिम व्यक्तींवर लक्ष केंद्रित करतील, असे त्यांनी म्हटले.
इस्रायलच्या मोसाद गुप्तचर संस्थेशी संबंध असल्याचा आणि देशात त्यांच्या कारवाया सुलभ केल्याचा आरोप असलेल्या अनेक व्यक्तींना इराणने याआधी फाशीची शिक्षा दिली आहे.
टीम स्ट्रॅटन्यूज
