![](https://bharatshakti.in/wp-content/uploads/2024/03/LT-BSI-Defence.gif")
वसाहतींच्या राजवटीपासून व्हिएतनामला स्वातंत्र्य मिळाल्याच्या 80व्या वर्धापनदिनानिमित्त, मंगळवारी व्हिएतनाममध्ये भव्यदिव्य परेडचे आयोजन करण्यात आले. गेल्या अनेक दशकांमधील ही सर्वात मोठी लष्करी परेड होती, ज्यामध्ये मोठ्या रोख रक्कमेचे वाटप केले गेले आणि जवळजवळ 14,000 कैद्यांची सुटका देखील करण्यात आली.
व्हिएतनामाची राजधानी हनोईच्या रस्त्यांवर हजारो लोक या परेडनिमित्त जमा झाले होते, ज्यापैकी बहुतेक लोकांनी लाल रंगाचे शर्ट घातले होते आणि व्हिएतनामी ध्वज हातात घेतले होते. यानिमित्ताने कम्युनिस्ट-शासित देशात राष्ट्रवादाची एक मजबूत भावना दिसून आली.
अटल वचनबद्धता
या परेडमध्ये, व्हिएतनामच्या सर्वात आधुनिक लष्करी उपकरणांचे जाहीर प्रदर्शन करण्यात आले- ज्यात विविध रणगाडे, क्षेपणास्त्रे, हेलिकॉप्टर आणि लढाऊ विमाने यांचा समावेश होता. चीन, रशिया आणि इतर देशांमधील हजारो व्हिएतनामी सैनिक आणि लष्करी कर्मचाऱ्यांनी या उत्सवात भाग घेतला होता.
“आपल्या पितृभूमीचे स्वातंत्र्य, सार्वभौमत्व आणि प्रादेशिक अखंडतेचे रक्षण करण्यासाठी, अगदी प्रत्येक इंच जमिनीसाठी आम्ही अटल आहोत,” असे व्हिएतनामच्या कम्युनिस्ट पक्षाचे प्रमुख तो लाम, यांनी परेडची सुरुवात करताना सांगितले.
“हा दृढनिश्चय आपल्या राष्ट्राच्या एकत्रित शक्तीतून येतो: राजकीय, आर्थिक, सांस्कृतिक, वैज्ञानिक, तांत्रिक, लष्करी, राजनैतिक आणि सर्वात महत्त्वाचे म्हणजे आपल्या लोकांच्या इच्छेतून दिसून येतो,” असेही ते म्हणाले.
‘प्रतीक्षा करणे सार्थ ठरले’
बा दिन्ह स्क्वेअरमध्ये, राष्ट्रीय नेते आणि परदेशी मान्यवरांनीलष्करी या भव्य परेडचा आनंद घेतला. याच ठिकाणी, 2 सप्टेंबर 1945 रोजी, क्रांतिकारी नेते हो ची मिन्ह यांनी व्हिएतनामच्या ऐतिहासिक स्वातंत्र्याची घोषणा केली होती.
त्यांच्या लढ्याने, जवळजवळ एक शतकाहून अधिक काळ चाललेल्या फ्रेंच वसाहतींच्या राजवटीनंतर आणि दुसऱ्या महायुद्धादरम्यान झालेल्या जपानी आक्रमणातून स्वतंत्र व्हिएतनामचा पाया रचला गेला. परंतु, फ्रेंचांनी नवीन देशाला मान्यता दिली नाही आणि 10 वर्षांचे युद्ध लढले, जे 1954 मध्ये त्यांच्या पराभवाने संपले.
“मी खूप आनंदी, समाधानी आणि खूप भावुक झाले आहे, अखेर मी सैनिकांना मार्च करताना पाहिले,” असे हनोईच्या निवासी होआंग थी हुएन (42) यांनी सांगितले. त्यांनी आणि त्यांच्या कुटुंबातील इतर चार सदस्यांनी जागा मिळवण्यासाठी जवळजवळ दोन दिवस पदपथावर तळ ठोकला होता.
“ही भव्यदिव्य आणि आकर्षक मिरवणूक पाहून, प्रतीक्षा करणे सार्थ ठरले. परेडमधील सैनिक आणि लढाऊ विमानांचे सादरीकरण खूपच अप्रतिम होते,” असेही त्या म्हणाल्या.
प्रत्येक नागरिकाला 100,000 डाँग
हनोई शहराच्या मध्यवर्ती भागातील रस्ते, परेडच्या सरावासाठी आणि मुख्य परेडसाठी तीन कामाच्या दिवसांसाठी बंद करण्यात आले होते.
वर्धापनदिनाच्या उत्सवाचा भाग म्हणून, व्हिएतनामने गेल्या आठवड्यात जाहीर केले की ते त्यांच्या 100 दशलक्ष नागरिकांपैकी प्रत्येकाला 100,000 डाँग ($3.80) देणार आहे. या अभूतपूर्व पॅकेजची किंमत देशाला $380 दशलक्ष इतकी पडू शकते.
अध्यक्ष लुओंग कुओंग यांनी, गेल्या आठवड्यात 13,920 कैद्यांसाठी मोठ्या माफीची घोषणा केली, ज्यांना त्यांच्या तुरुंगवासाची मुदत संपण्यापूर्वीच सोडले जाईल. यात 66 परदेशी कैद्यांचाही समावेश आहे.
कॅम रान्हच्या खोल समुद्रातील खाडीतही उत्सव साजरा करण्यात आला, ज्यात व्हिएतनामच्या पाणबुड्या आणि फ्रिगेट्सचा ताफा होता, जो मुख्यतः रशियाकडून आयात केला गेला आहे.
टीम स्ट्रॅटन्यूज
(रॉयटर्सच्या इनपुट्ससह)
