![](https://bharatshakti.in/wp-content/uploads/2024/03/LT-BSI-Defence.gif")
भारतीय हवाई दल (IAF), 26 जानेवारी होणाऱ्या 77व्या प्रजासत्ताक दिन सोहळ्यातील हवाई संचलनादरम्यान (फ्लायपास्ट), ‘सिंदूर’ प्रकारांतर्गत लढाऊ विमानांचे विशेष फॉर्मेशन सादर करणार आहे. हे फॉर्मेशन हवाई दलाची युद्धसज्जता अधोरेखित करेल आणि गेल्यावर्षी मे महिन्यात राबवलेल्या ‘ऑपरेशन सिंदूर’च्या यशाची आठवण करून देईल.
‘सिंदूर’ फॉर्मेशनमध्ये सात आघाडीची लढाऊ विमाने सहभागी होतील, ज्यात दोन राफेल, दोन सुखोई-30 एमकेआय, दोन मिग-29 आणि एका जग्वार फायटरचा समावेश आहे. परेडपूर्वी प्रसारमाध्यमांना माहिती देताना, ग्रुप कॅप्टन धर्मेंद्र सिंह यांनी या फॉर्मेशनचा सविस्तर तपशील दिला.
प्रजासत्ताक दिनाच्या फ्लायपास्टमध्ये, एकूण 29 विमाने सहभागी होतील, ज्यामध्ये 16 लढाऊ विमाने, चार मालवाहू विमाने आणि नऊ हेलिकॉप्टरचा समावेश आहे. या सादरीकरणामध्ये सिंदूर, ध्वज, प्रहार, गरुड, अर्जन, वरुण आणि वज्रांग अशा अनेक फॉर्मेशन्सचा समावेश असेल.
स्मरणार्थ प्रदर्शनाचा भाग म्हणून, यातील एक फॉर्मेशन ‘ऑपरेशन सिंदूर’चा ध्वज घेऊन उड्डाण करेल. 7 मे ते 10 मे दरम्यान राबवण्यात आलेले हे अत्यंत अचूक ‘त्रि-सेवा’ लष्करी ऑपरेशन होते, ज्याने पाकिस्तानसोबतच्या भारताच्या अलीकडील लष्करी संघर्षात एक महत्त्वपूर्ण टप्पा गाठला.
अग्निवीरांचा सहभाग
प्रजासत्ताक दिनाच्या संचलनात, वायुसेनेच्या बँड पथकाचा भाग म्हणून 9 महिला अग्निवीरांसह 66 अग्निवीरांचा सहभागही पाहायला मिळेल.
फ्लाइंग ऑफिसर अक्षिता धनकर आणि फ्लाइंग ऑफिसर शिव एस. शेखावत हे समारंभादरम्यान, राष्ट्रपती द्रौपदी मुर्मू यांच्यासोबत राष्ट्रध्वजाचे ध्वजारोहण करतील.
स्क्वॉड्रन लीडर जगदेश कुमार भारतीय हवाई दलाच्या 144 सदस्यीय मार्चिंग तुकडीचे नेतृत्व करतील, तर त्यांना IAF च्या बँडची संगीतमय साथ लाभेल.
टीम भारतशक्ती
