कोचीन शिपयार्डकडून स्वदेशी पाणबुडीविरोधी जहाज ‘माहे’ नौदलाला सुपूर्द

आठ पाणबुडीविरोधी वॉरफेअर शॅलो वॉटर क्राफ्ट्सपैकी (ASW SWC) पहिले ‘माहे’ जहाज कोचीन शिपयार्ड लिमिटेडने (CSL) भारतीय नौदलाला सुपूर्द केले आहे.

78 मीटर लांबीची ही युद्धनौका भारताच्या स्वदेशी जहाजबांधणी कार्यक्रमातील एक मोठे पाऊल आहे. डिझेल इंजिन आणि वॉटरजेट प्रोपल्शन सिस्टमद्वारे चालवले जाणारे हे सर्वात मोठे भारतीय नौदल जहाज आहे. पाण्याखालील देखरेख, पाणबुडीविरोधी युद्ध, शोध आणि बचाव तसेच कमी तीव्रतेच्या सागरी ऑपरेशन्ससाठी डिझाइन केलेले, माहे उथळ किनारी पाण्यात नौदलाची ऑपरेशनल पोहोच वाढवेल अशी अपेक्षा आहे.

“ASW SWC जहाजांच्या समावेशामुळे किनारी भागात भारतीय नौदलाची पाणबुडी विरोधी युद्ध क्षमता लक्षणीयरीत्या वाढेल,” असे CSL च्या प्रवक्त्याने सांगितले. हा प्रकल्प सरकारच्या आत्मनिर्भर भारत उपक्रमांतर्गत संरक्षण उत्पादनात भारताच्या वाढत्या स्वावलंबनाला अधोरेखित करतो.

कोची येथील भारतीय नौदलाच्या युद्धनौका उत्पादन पथकाच्या देखरेखीखाली बांधलेले, माहे हे जहाज डेट नॉर्स्के व्हेरिटासच्या (DNV) वर्गीकरण नियमांनुसार उभारण्यात आले आहे.

CSL अधिकाऱ्यांच्या मते, ASW SWC वर्गातील जहाजे हल-माउंटेड सोनार आणि लो-फ्रिक्वेंसी व्हेरिएबल-डेप्थ सोनार (LFVDS) यासह अत्याधुनिक सोनार प्रणालींनी सुसज्ज आहेत आणि हलक्या वजनाच्या टॉर्पेडो, पाणबुडीविरोधी रॉकेट, 30 मिमी नौदल तोफा आणि 12.7 मिमी स्थिर रिमोट-कंट्रोल्ड गनने (SRCG) सज्ज आहेत. या प्रणालींमुळे जहाजांना किनारी तसेच उथळ समुद्राच्या वातावरणात पाण्याखालील धोके शोधण्यास, ट्रॅक करण्यास आणि त्यांना निशस्त्र करण्यास सक्षम करतात.

90 टक्क्यांपेक्षा जास्त स्वदेशी सामग्रीचा वापर करण्यात आलेले माहे जहाज नौदलाच्या संरक्षण परिसंस्थेच्या क्षमतांचे प्रदर्शन करते, याशिवाय स्वदेशी जहाजबांधणीवर भर देण्याचा त्यांचा प्रयत्न प्रतिबिंबित करते. मालिकेतील उर्वरित जहाजे सीएसएल येथे बांधकामाच्या विविध टप्प्यात आहेत.

दरम्यान, सीएसएलने या आठवड्यात कोची येथील सुविधेवर त्याच मालिकेतील सहावा एएसडब्ल्यू एसडब्ल्यूसी ‘मॅगडाला’ लाँच करून आणखी एक महत्त्वाचा टप्पा गाठला. युद्धनौका उत्पादन आणि अधिग्रहण नियंत्रक (सीडब्ल्यूपी अँड ए) व्हाइस अ‍ॅडमिरल राजाराम स्वामीनाथन यांच्या उपस्थितीत हे जहाज लाँच करण्यात आले. या प्रसंगी नौदल आणि सीएसएलचे वरिष्ठ अधिकारी उपस्थित होते.

नौदल प्रकल्पांव्यतिरिक्त, कोचीन शिपयार्ड त्यांच्या व्यावसायिक जहाजबांधणी पोर्टफोलिओचा विस्तार करत आहे. शिपयार्डने अलीकडेच दोन इतर जहाजे लाँच केली आहेत – पेलाजिक विंड सर्व्हिसेस, सायप्रससाठी कमिशनिंग सर्व्हिस ऑपरेशन व्हेसेल (CSOV) आणि ड्रेजिंग कॉर्पोरेशन ऑफ इंडिया (DCI), मुंबईसाठी सर्वात मोठे स्वदेशी निर्मित ड्रेजर. भारताच्या सागरी उद्योगासाठी हा अभिमानाचा क्षण आहे.

माहेच्या समावेशामुळे भारताची केवळ समुद्राखालील युद्ध क्षमताच मजबूत झाली नसून प्रगत जहाजबांधणी आणि सागरी तंत्रज्ञानात जागतिक पातळीवर  कोचीन शिपयार्डची वाढती भूमिका देखील अधोरेखित करते.

टीम भारतशक्ती