स्पष्टीकरण: ऑपरेशन ॲब्सोल्यूट रिझॉल्व्ह नक्की कसे पार पडले?

ऑपरेशन ॲब्सोल्यूट रिझॉल्व्ह ही अमेरिकेचे एक लष्करी कारवाई होती, ज्यात व्हेनेझुएलाचे राष्ट्राध्यक्ष निकोलस मादुरो यांना पकडण्यात आले. अर्थात याबाबतची घोषणा अचानक झाली असली तरी, या कारवाईचे नियोजन बऱ्याच काळापासून सुरू होते. अमेरिकेच्या लष्करी नेत्यांनी नंतर स्पष्ट केले की, यामध्ये केलेली काळजीपूर्वक तयारी, गुप्तचर माहितीचे काम आणि सशस्त्र दलांच्या विविध शाखांमधील समन्वय यांचा समावेश होता.

कारवाईच्या काही महिने आधी, अमेरिकेने व्हेनेझुएलाजवळ आपली लष्करी उपस्थिती वाढवली होती. यूएसएस गेराल्ड फोर्ड या विमानवाहू नौका गटाला त्या प्रदेशात पाठवणे हे एक महत्त्वाचे पाऊल होते. त्याच वेळी, गुप्तचर यंत्रणा मादुरो यांची दिनचर्या आणि हालचालींवर बारकाईने लक्ष ठेवून होते. डिसेंबरच्या सुरुवातीपर्यंत, अधिकाऱ्यांना विश्वास होता की त्यांच्याकडे कारवाई करण्यासाठी पुरेशी माहिती आहे, परंतु खराब हवामानामुळे या कारवाईला विलंब झाला.

शनिवारी (3 जानेवारी, 2026) रात्री 10:46 वाजता (पूर्व वेळेनुसार) राष्ट्राध्यक्ष डोनाल्ड ट्रम्प यांनी अंतिम मंजुरी दिल्यानंतर हे अभियान अधिकृतपणे सुरू झाले. त्यानंतर पश्चिम गोलार्धातील अनेक तळांवरून विमानांनी उड्डाण केले. यामध्ये लढाऊ विमाने, बॉम्बर विमाने, हेलिकॉप्टर, ड्रोन आणि पाळत ठेवणारी विमाने यांसह 150 हून अधिक विमानांचा सहभाग होता. विविध लष्करी शाखांमधील कर्मचाऱ्यांनी यात भाग घेतला, ज्यात अगदी तरुण क्रू सदस्यांपासून ते अत्यंत अनुभवी सदस्यांपर्यंत सर्वांचा समावेश होता.

हेलिकॉप्टर्स काराकासमध्ये दाखल होण्यापूर्वी, अमेरिकेच्या सायबर आणि अंतराळ युनिट्सनी व्हेनेझुएलाच्या संरक्षण प्रणालींमध्ये व्यत्यय आणला. यामुळे प्रतिकार कमी होण्यास मदत झाली. हेलिकॉप्टर्सनी ओळख टाळण्यासाठी पाण्याच्या अगदी जवळून उड्डाण केले आणि त्यांना F-22, F-35 आणि लांब पल्ल्याच्या बॉम्बरसारख्या प्रगत विमानांचे संरक्षण मिळाले होते.

पहाटे 1:00 च्या सुमारास, अमेरिकन सैन्य मादुरो यांच्या निवासस्थानी पोहोचले. अटक करायला आलेले पथक वेगाने आपल्या लक्ष्याकडे सरसावले. राष्ट्राध्यक्ष ट्रम्प यांच्या मते, मादुरो यांनी एका सुरक्षित खोलीत पळून जाण्याचा प्रयत्न केला, परंतु अमेरिकन सैनिकांनी त्यांना रोखले. या मोहिमेदरम्यान, अमेरिकन विमानांवर गोळीबार करण्यात आला आणि त्यांनी आत्मसंरक्षणासाठी प्रत्युत्तर दिले. एका विमानाचे नुकसान झाले, परंतु सर्व विमाने सुरक्षितपणे परत येऊ शकली.

सैन्य माघारी परतत असताना, आणखी काही बचावात्मक चकमकी झाल्या. असे असूनही, माघार यशस्वी झाली. पहाटे 3:29 पर्यंत, सर्व विमाने व्हेनेझुएलाच्या हवाई हद्दीतून बाहेर पडली होती आणि मादुरो यांना सपत्नीक यूएसएस इवो जिमा येथे नेण्यात आले.

मिळालेल्या वृत्तानुसार, या कारवाईत अमेरिकेचा एकही सैनिक मारला गेला नाही किंवा कोणतेही विमान नष्ट झालेले नाही. लष्करी नेत्यांनी सांगितले की, या मोहिमेच्या यशामुळे प्रशिक्षण आणि समन्वयाचे महत्त्व दिसून येते. त्यांनी असेही सांगितले की, भविष्यात या प्रदेशात पुढील कारवाईची गरज भासल्यास अमेरिकन सैन्य सज्ज आहे.

टीम भारतशक्ती