DRDO कडून दोन प्रलय क्षेपणास्त्रांची एका मागोमाग एक यशस्वी चाचणी

भारताने बुधवारी स्वदेशात विकसित केलेल्या दोन ‘प्रलय’ क्षेपणास्त्रांचे एकाच वेळी यशस्वी प्रक्षेपण केले, ज्यामुळे देशाच्या सामरिक क्षेपणास्त्र क्षमतेमध्ये आणखी एक महत्त्वाचा टप्पा गाठला गेला आहे. DRDO अर्थात संरक्षण संशोधन आणि विकास संस्थेने वापरकर्ता मूल्यांकन चाचण्यांचा भाग म्हणून, ओदिशाच्या किनाऱ्याजवळ सकाळी 10.30 वाजता ही चाचणी घेतली.

संरक्षण मंत्रालयाने एका निवेदनात म्हटले आहे की, दोन्ही क्षेपणास्त्रे एकाच लाँचरमधून एकामागून एक डागण्यात आली आणि त्यांनी ‘उद्दिष्टानुसार मार्गाचे अनुसरण केले, तसेच सर्व उड्डाण उद्दिष्टे पूर्ण केली’. चांदीपूर येथील एकात्मिक चाचणी श्रेणीद्वारे तैनात केलेल्या ट्रॅकिंग सेन्सर्सनी या उड्डाणांवर लक्ष ठेवले, तर लक्ष्यभेदाच्या ठिकाणांजवळ जहाजांवर बसवलेल्या टेलिमेट्री प्रणालींनी अंतिम टप्प्यातील घडामोडींवर लक्ष ठेवले.

‘प्रलय’ हे स्वदेशी बनावटीचे, घन इंधन वापरणारे क्वासी-बॅलिस्टिक क्षेपणास्त्र असून, अचूकतेसाठी यामध्ये अत्याधुनिक मार्गदर्शक आणि दिशादर्शक प्रणालीचा वापर करण्यात आला आहे. हे क्षेपणास्त्र विविध लक्ष्यांवर मारा करण्यासाठी अनेक प्रकारची  स्फोटक सामग्री वाहून नेण्यासाठी सक्षम आहे.

या क्षेपणास्त्राची निर्मिती हैदराबादमधील ‘रिसर्च सेंटर इमारात’ ने DRDO च्या इतर प्रयोगशाळा आणि विकास व उत्पादन भागीदार भारत डायनॅमिक्स लिमिटेड आणि भारत इलेक्ट्रॉनिक्स लिमिटेड यांच्या सहकार्याने केली आहे. या चाचणीसाठी यंत्रणांचे एकत्रीकरण देखील याच दोन भागीदार कंपन्यांनी केले.

DRDO चे वरिष्ठ शास्त्रज्ञ, भारतीय हवाई दल तसेच भारतीय लष्कराचे प्रतिनिधी आणि उद्योग क्षेत्रातील मान्यवर या ऐतिहासिक क्षणाचे साक्षीदार होते.

संरक्षण मंत्री राजनाथ सिंह यांनी या यशस्वी चाचणीबद्दल DRDO, हवाई दल, लष्कर आणि उद्योगांचे अभिनंदन केले. या चाचणीमुळे प्रलय क्षेपणास्त्राची विश्वासार्हता सिद्ध झाली असल्याचे त्यांनी सांगितले.

टीम भारतशक्ती