लेफ्टनंट जनरल पुष्पेंद्र सिंह यांनी उपप्रमुख पदाचा स्वीकारला पदभार

31 जुलै रोजी निवृत्त झालेल्या लेफ्टनंट जनरल एन. एस. राजा सुब्रमण्यम यांच्या जागी लेफ्टनंट जनरल पुष्पेंद्र सिंह यांनी आज लष्कर उप प्रमुख (VCOAS) म्हणून पदभार स्वीकारला. जनरल पुष्पेंद्र सिंह आपल्या कार्यकाळाची सुरुवात पाच सैनिकांना श्रद्धांजली अर्पण करून केली.

आपल्या पदाच्या पहिल्या दिवशी लेफ्टनंट जनरल सिंह यांनी आपल्या शहीद सहकाऱ्यांच्या कुटुंबियांसह नवी दिल्लीतील राष्ट्रीय युद्ध स्मारकाला भेट दिली. त्यांनी त्याग चक्रावर पुष्पहार अर्पण केला, जिथे त्यांची नावे कोरलेली आहेत आणि सेवा आणि बलिदानाच्या मूल्यांप्रती त्यांच्या वचनबद्धतेचा पुनरुच्चार केला.

भारतीय शांतता रक्षक दलात (आय. पी. के. एफ.) एक तरुण सेकंड लेफ्टनंट म्हणून, लेफ्टनंट जनरल सिंह यांनी जुलै 1989 मध्ये किलिनोच्चीजवळ झालेल्या हल्ल्यादरम्यान 13 सदस्यीय Quick Reaction Team चे (जलद प्रतिक्रिया पथक) नेतृत्व केले होते. गंभीर दुखापत होऊनही, त्यांनी शत्रूवर प्रतिहल्ला केला, आपल्या टीमला वाचवले, परंतु या संघर्षात पाच सैनिक गमावले. ही एक अशी घटना होती ज्याने त्यांच्या आयुष्यावर आणि कारकिर्दीवर कायमस्वरूपी छाप सोडली.

लेफ्टनंट जनरल पुष्पेंद्र सिंह हे डिसेंबर 1987 मध्ये दि पॅराशूट रेजिमेंटच्या (विशेष दल) चौथ्या बटालियनमध्ये नियुक्त झाले आणि लष्कराच्या सेवेत रुजू झाले होते. लेफ्टनंट जनरल सिंह यांच्याकडे सुमारे चार दशकांचा परिचालन आणि धोरणात्मक अनुभव आहे. त्यांच्या आतापर्यंतच्या सेवेमध्ये ऑपरेशन पवन (श्रीलंका), ऑपरेशन मेघदूत (सियाचीन), ऑपरेशन ऑर्किड (ईशान्य) आणि ऑपरेशन रक्षक (जम्मू-काश्मीर) मधील प्रमुख भूमिकांचा समावेश आहे. ऑपरेशन स्नो लेपर्ड दरम्यान त्यांनी काश्मीरमधील विशेष दलाचे पथक, पायदळ ब्रिगेड आणि पर्वतीय विभागाचे नेतृत्व केले आहे. अगदी अलीकडे, त्यांनी जम्मू, सांबा आणि पठाणकोट क्षेत्रांवर देखरेख ठेवणाऱ्या महत्त्वपूर्ण दलाचे नेतृत्व केले.

ला मार्टिनियर महाविद्यालय आणि लखनौ विद्यापीठाचे माजी विद्यार्थी असलेले लेफ्टनंट जनरल सिंह हे डीएसएससी वेलिंग्टन आणि सीडीएम सिकंदराबादचे पदवीधर आहेत आणि त्यांनी उस्मानिया आणि पंजाब विद्यापीठांमधून पुढील पदवी प्राप्त केली आहे. शौर्य आणि विशिष्ट सेवेसाठी त्यांना अति विशिष्ट सेवा पदक आणि बार टू सेना पदकाने सन्मानित करण्यात आले आहे.

आपल्या श्रद्धांजली वाहण्याच्या महत्त्वावर बोलताना लेफ्टनंट जनरल सिंग म्हणाले, “नेतृत्वाची सुरुवात तुम्ही कोठून आला आहात हे लक्षात ठेवून आणि तुमच्याबरोबर चाललेल्या लोकांचा सन्मान करून होते.”

उपसेनापती म्हणून त्यांनी केलेले पहिलेच कार्य एक स्पष्ट संदेश देतेः भारतीय सैन्यात कोणालाही एकटे मागे सोडले जात नाही.

टीम भारतशक्ती