चिनी डिजिटल धमक्यांच्या सततच्या प्रयत्नांमुळे तैवान सतर्क

गेल्या आठवड्यात चीनने तैवानच्या आसपास उच्च-स्तरीय नौदल आणि हवाई सराव केला, ज्यामध्ये तैवानच्या किनारपट्टीजवळ क्षेपणास्त्रे डागण्यात आली. या आठवड्यात, बीजिंगने अधिक सूक्ष्म मार्ग अवलंबला आहे, आणि तैवानच्या सत्ताधारी पक्षाचे आमदार पुमा शेन यांच्या घराची व्यावसायिक उपग्रह प्रतिमा प्रसारित करण्यासाठी आपल्या सायबर कौशल्याचा वापर केला आहे. तैवानच्या अधिकाऱ्यांनी या कृतीचा निषेध करत, ही वैयक्तिक माहिती उघड करून सार्वजनिक व्यक्तींना धमकावण्याचा उघड प्रयत्न असल्याचे म्हटले आहे.

जरी तैवानच्या डिजिटल व्यवहार मंत्रालयाच्या दबावानंतर या प्रतिमा अखेरीस मुख्य सोशल मीडिया प्लॅटफॉर्मवरून काढून टाकण्यात आल्या असल्या तरी, धमकावण्याच्या या सूक्ष्म प्रयत्नाने हे अधोरेखित केले आहे की, तैवानला किंवा तैवानी लोकांना आपल्या विचारसरणीनुसार वागायला लावण्यासाठी बीजिंग कोणत्याही थराला जाऊ शकते.

तैवानच्या राष्ट्रीय सुरक्षा ब्युरोने (NSB) नुकत्याच प्रसिद्ध केलेल्या अहवालात म्हटले आहे की, पुमा शेन यांची वैयक्तिक माहिती उघड करणे ही डिजिटल आक्रमणाच्या मोठ्या मोहिमेचा एक भाग आहे. 2025 मधील चीनच्या सायबर कारवायांच्या NSB च्या विश्लेषणानुसार, तैवानच्या महत्त्वाच्या पायाभूत सुविधांवर दररोज सरासरी 26.3 लाख सायबर हल्ल्यांचे प्रयत्न झाले, जी संख्या दोन वर्षांपूर्वीच्या तुलनेत दुप्पटीपेक्षा जास्त आहे.

परराष्ट्र मंत्रालयाने शेन यांच्या वैयक्तिक माहितीच्या प्रसाराचे वर्णन ‘डिजिटल हुकूमशाही’ आणि तैवानच्या लोकशाही समाजावर ‘भीतीचे वातावरण’ निर्माण करण्याचा प्रयत्न असे केले आहे. त्यांनी या कृतीची तुलना आंतरराष्ट्रीय मानवाधिकार नियमांचे उल्लंघन करणाऱ्या आंतरराष्ट्रीय दडपशाहीशी केली आहे.

विश्लेषकांच्या मते, या घटनेमुळे एका चिंताजनक प्रवृत्तीवर प्रकाश पडतो, जिथे बीजिंग आपल्या पारंपरिक लष्करी आणि राजनैतिक दबावाला, जसे की बेटाभोवतीच्या प्रत्यक्ष गोळीबाराच्या सरावाला, राजकीय कथन घडवण्याच्या उद्देशाने असलेल्या अधिक सूक्ष्म परंतु सर्वव्यापी डिजिटल डावपेचांची जोड देत असल्याचे दिसते.

ही घटना शेन यांच्यासारख्या तैवानी खासदारांना भेडसावणाऱ्या धोक्यांवरही प्रकाश टाकते, जे बीजिंगचे वारंवार लक्ष्य असतात. गेल्या वर्षी, चीनने कथित ‘फुटीरतावादी कारवाया’ केल्याबद्दल त्यांना ‘फरार’ घोषित केले होते. दुसरीकडे तैपेईने मात्र राजकीयदृष्ट्या प्रेरित आणि कायदेशीरदृष्ट्या हे आरोप निराधार असल्याचे सांगत फेटाळून लावले आहे. शेन हे ‘कुमा अकादमी’चे सह-संस्थापक देखील आहेत, ही संस्था चिनी अपप्रचाराचा सामना करण्यासाठी नागरी संरक्षण आणि माध्यम साक्षरतेवर लक्ष केंद्रित करते.

या कृतीचा निषेध करण्याबरोबरच, तैवानच्या अधिकाऱ्यांनी शेन यांची सुरक्षा वाढवली आहे आणि मेटासारख्या जागतिक प्लॅटफॉर्मवर अशी हानिकारक सामग्री काढून टाकण्यासाठी दबाव आणला आहे.

ही घटना या गोष्टीचे संकेत देते की, सायबरस्पेस हे बीजिंगसोबतच्या दीर्घकालीन संघर्षात एक नवीन रणांगण बनले आहे, जिथे प्रचार, कायदेशीर साधने आणि डिजिटल घुसखोरी भू-राजकीय स्पर्धेच्या परिचित पद्धतींना अधिक बळकटी देतात.

अनुकृती