![](https://bharatshakti.in/wp-content/uploads/2024/03/LT-BSI-Defence.gif")
इस्रायलचे पंतप्रधान बेंजामिन नेतन्याहू यांचा भारत दौरा बऱ्याच काळापासून प्रलंबित आहे. अहवालानुसार, त्यांचा दौरा 2019 मध्ये नियोजित होता, परंतु अंतर्गत राजकीय संकट, कोविड महामारी आणि गाझा संघर्षामुळे तो रद्द करण्यात आला.
मनीकंट्रोलने दिलेल्या माहितीनुसार, 2019 मध्येच इस्रायलमधील संसदीय निवडणुकांमुळे त्यांनी आपला दौरा दोनवेळा पुढे ढकलला होता. नेतन्याहू यांची शेवटचा भारत दौरा 2018 मध्ये झाला होता. इस्रायली पंतप्रधानांनी भारताला भेट देण्याची ही केवळ दुसरी वेळ होती.
हा दिवसीय दौरा, पंतप्रधान नरेंद्र मोदींच्या 2017 मधील इस्रायलच्या ऐतिहासिक भेटीनंतर झाला होता, जो त्यावेळी द्विपक्षीय संबंधांमधील एक महत्त्वाचा टप्पा मानला गेला होता.
तर मग, यावेळी इतका विलंब का होत आहे? इस्रायलने सध्या, उत्तर पश्चिम किनाऱ्यावर एक मोठी दहशतवादविरोधी कारवाई सुरू केली आहे, जी पुढील अनेक दिवस चालण्याची अपेक्षा आहे. परंतु, इतर अहवाल सांगतात की, दिल्लीतील लाल किल्ल्याजवळ झालेल्या स्फोटानंतर, निर्माण झालेल्या सुरक्षा समस्यांमुळे हा दौरा रद्द करण्यात आला आहे.
परंतु, नेतन्याहू यांच्या कार्यालयाने स्पष्ट केले की, “इस्रायलचे भारतासोबतचे आणि पंतप्रधान नेतन्याहू यांचे पंतप्रधान नरेंद्र मोदींसोबतचे संबंध खूप दृढ आहेत. पंतप्रधान मोदींच्या नेतृत्वाखालील भारताच्या सुरक्षेवर, नेतन्याहू यांचा पूर्ण विश्वास आहे आणि नवीन भेटीची तारीख निश्चित करण्यासाठी संबंधित पथके समन्वय साधत आहेत.”
यावर्षी, राजकीय अस्थिरतेसह देशांतर्गत मुद्द्यांमुळे त्यांचा दौरा रद्द करण्यात आला आहे. मनीकंट्रोलने अहवाल दिला आहे की, “यावर्षी एप्रिल आणि सप्टेंबरमध्ये दोन्ही वेळेस, इस्रायलमधील वाढत्या दबावामुळे नेतन्याहू यांनी नियोजित भेटी रद्द केल्या. अचानक निवडणुका लागण्याची शक्यता आणि गाझा युद्धामुळे वाढलेला तणाव ही प्रमुख कारणे देण्यात आली.”
एप्रिलमध्ये झालेल्या आंदोलनांदरम्यान, 7 ऑक्टोबर 2023 रोजी, हमासने इस्रायलवर केलेल्या हल्ल्यादरम्यान पकडलेल्या सर्व ओलिसांची सुटका करण्याची आणि युद्धविरामाची मागणी करण्यात आली होती. तसेच, अंतर्गत सुरक्षा संस्था ‘शिन बेट’ च्या प्रमुखांना नेतन्याहू यांनी पदावरून काढून टाकल्यामुळे आणि ॲटर्नी जनरलला पदावरून हटवण्याच्या हालचालींविरोधातही निदर्शने झाली होती.
गाझा मोहीम, न्यायिक सुधारणा आणि अति-रूढीवादी ज्यू गटांसाठी दिलेली सूट यांसारख्या मुद्द्यांवरून, नेतन्याहू यांचे युती भागीदारांशी असलेले वाद, हे देखील परदेशात प्रवास न करण्याची इतर कारणे असल्याचे म्हटले जात आहे.
टीम स्ट्रॅटन्यूज
