जपान: सत्ताधारी पक्षाचे नेतृत्व करण्यास कोइझुमी आणि हयाशीही इच्छुक

जपानचे कृषी मंत्री शिंजीरो कोइझुमी आणि मुख्य कॅबिनेट सचिव योशिमासा हयाशी यांनी मंगळवारी सत्ताधारी पक्षाच्या प्रमुखपदासाठी आपल्या उमेदवारीची औपचारिक घोषणा केली. पुढील महिन्याच्या सुरुवातीला होणाऱ्या नेतृत्व मतदानात पंतप्रधान शिगेरू इशिबा यांचा उत्तराधिकारी निश्चित केला जाईल. इशिबा त्यावेळी आपले पद सोडणार आहेत.

इशिबा यांनी या महिन्यात राजीनामा देण्याची घोषणा केली आणि त्यांच्या सत्ताधारी लिबरल डेमोक्रॅटिक पक्षासाठी (एलडीपी) नेता निवडण्याचे काम कठीण करणाऱ्या निवडणुकीत झालेल्या पराभवाची जबाबदारी घेतली.

कृषी मंत्री कोइझुमी यांनी पत्रकार परिषदेत सांगितले की त्यांनी आठवड्याच्या शेवटी समर्थकांना एलडीपी नेता म्हणून निवडणूक लढवण्याचा त्यांचा हेतू कळवला होता. अर्थमंत्री कात्सुनोबू काटो त्यांच्या प्रचार मोहिमेचे नेतृत्व करणार आहेत.

माजी पंतप्रधान जुनिचिरो कोइझुमी यांचे पुत्र या वर्षी तांदळाच्या वाढत्या किमती रोखण्याच्या त्यांच्या कामात काही प्रमाणात यशस्वी झाले.

गेल्या वर्षी सप्टेंबरमध्ये एलडीपीच्या मागील नेतृत्व स्पर्धेत सर्वात कमी मते मिळवणारे काटो यांनी एका वेगळ्या पत्रकार परिषदेत सांगितले की ते “पक्षाला एकत्र आणण्याच्या” भावनेने यावेळी कोइझुमी यांना पाठिंबा देतील.

इशिबा सरकारचे सर्वोच्च प्रवक्ते म्हणून काम केलेले मुख्य कॅबिनेट सचिव हयाशी यांनी एक्सवर दुपारी 12.30 वाजता (03.30 GMT) आपली उमेदवारी जाहीर केली आणि त्यानंतर औपचारिक पत्रकार परिषद घेतली.

“स्थिरता आणि विकास संतुलित करणाऱ्या नवीन प्रशासनाचे नेतृत्व करणे हे माझे ध्येय आहे,” हयाशी यांनी पोस्ट केले.

इतर उमेदवार

माजी परराष्ट्र मंत्री तोशिमित्सु मोटेगी हे गेल्या आठवड्यात सर्वात आधी उमेदवारीसाठी इच्छुक असल्याचे बघायला मिळाले होते, त्यानंतर माजी आर्थिक सुरक्षा मंत्री ताकायुकी कोबायाशी हे होते.

या आठवड्यात माजी अंतर्गत व्यवहार मंत्री साने ताकाची, ज्या सरकारी प्रोत्साहन आणि आर्थिक सुलभतेच्या समर्थक आहेत, त्या जपानच्या पहिल्या महिला नेत्या बनू शकतात, त्या देखील त्यांच्या उमेदवारीची घोषणा करतील अशी अपेक्षा आहे.

जपानच्या पुढील नेत्याची निवड पूर्वीपेक्षा अधिक गुंतागुंतीची आहे कारण युद्धोत्तर काळात बहुतेक काळ राज्य करणाऱ्या एलडीपी आणि त्यांच्या युती भागीदार कोमेइतो यांनी इशिबा यांच्या कार्यकाळात संसदेच्या दोन्ही सभागृहात बहुमत गमावले आहे.

टीम स्ट्रॅटन्यूज
(रॉयटर्सच्या इनपुट्ससह)