मंगळवारी पाकिस्तानच्या बलुचिस्तान प्रांतातील बंडखोरांनी, पेशावरला जाणाऱ्या ट्रेनवर हल्ला करत हायजॅक केले. ज्यामध्ये महिला आणि मुलांसह सुमारे 450 प्रवाशांना ओलीस ठेवले. या भागात वाढत असलेल्या फुटीरतावादी संघर्षाच्या पार्श्वभूमीवर हा हल्ला करण्यात आला.
त्यानंतर अतिरेक्यांनी ओलीस ठेवलेल्या प्रवाशांपैकी बहुतांश महिला आणि मुलांची सुटका केली, परंतु लष्करी कर्मचाऱ्यांसह 214 जणांना ताब्यात घेतले.
प्राणघातक हल्ले करण्यासाठी ओळखल्या जाणाऱ्या बलुचिस्तान लिबरेशन आर्मी (BLA), या फुटीरतावादी दहशतवादी गटाने हल्ल्याची जबाबदारी स्वीकारली आणि ट्रेनमधून अनेक सुरक्षा कर्मचाऱ्यांना ताब्यात घेतल्याची पुष्टी केली.
पाकिस्तानी लष्करातील बळी
या कारवाईत 30 हून अधिक लष्करी जवान ठार झाल्याचा दावा, या गटाने एका निवेदनात केला आहे.
“काही तास चाललेल्या चकमकीत आतापर्यंत ३० हून अधिक शत्रू [पाकिस्तानी] सैनिक मारले गेले आहेत, तर अनेक जण जखमी झाले आहेत, तर कब्जा करणाऱ्या सैन्याचे [पाकिस्तानी सैनिकांचे] मोठे नुकसान झाले आहे,” असे निवेदनात म्हटले आहे.
बीएलएच्या मते, त्यांच्या लढवय्यांनी बोलानच्या मशकाफ, धादर येथे जाफर एक्सप्रेसवर हल्ला केला आणि रेल्वे रुळ उडवून ती थांबवण्यास भाग पाडले.
“आमच्या लढवय्यांनी वेगाने ट्रेनचा ताबा घेतला आणि सर्व प्रवाशांना ओलीस ठेवले,” असे या गटाने म्हटले आहे, तसेच ही कारवाई बलुचिस्तानच्या स्वातंत्र्यासाठी सुरू असलेल्या त्यांच्या संघर्षाचा एक भाग असल्याचेही त्यांनी सांगितले आहे.
स्थानिक पोलिस आणि रेल्वे अधिकाऱ्यांनी गोळीबारात ट्रेनचा चालक जखमी झाल्याचे वृत्त दिले आहे.
बचाव पथक तैनात
हल्ला झाला तेव्हा ट्रेन क्वेट्टाहून पेशावरला जात होती. अतिरेक्यांना पकडण्यासाठी आणि बंदिवानांना सोडवण्यासाठी ऑपरेशन सुरू करून सुरक्षा दल आणि बचाव पथके घटनास्थळी तैनात करण्यात आली होती.
तथापि, बीएलएने दावा केला की त्यांनी पाकिस्तानी सैन्याने केलेल्या जमिनीवरील हल्ल्याला यशस्वीरित्या परतवून लावले आहे, ज्यामुळे सैन्याला माघार घ्यावी लागली.
गटाने पुढे म्हटले आहे की शेकडो सुरक्षा कर्मचारी त्यांच्या ताब्यात आहेत.
“सैन्य, निमलष्करी, पोलिस आणि गुप्तचर अधिकाऱ्यांसह २१४ पाकिस्तानी कर्मचाऱ्यांना बीएलएने युद्धाच्या नियमांनुसार पूर्ण सुरक्षेत ठेवले आहे,” असे गटाने निवेदनात म्हटले आहे.
परिस्थिती तणावपूर्ण आहे, उर्वरित बंदिवानांना परत मिळवण्यासाठी आणि रेल्वे मार्ग सुरक्षित करण्यासाठी पाकिस्तानी अधिकारी प्रयत्न करत आहेत.
48 तासांची अंतिम मुदत
बीएलए बंडखोरांनी पाकिस्तानी अधिकाऱ्यांना “बलूच राजकीय कैदी, जबरदस्तीने बेपत्ता झालेले व्यक्ती आणि राष्ट्रीय प्रतिकार कार्यकर्त्यांची” तात्काळ आणि बिनशर्त सुटका करण्यासाठी 48 तासांचा “अल्टिमॅटम” दिला आहे.
जर या प्रदेशात लष्करी हवाई हल्ले सुरू राहिले तर सर्व ओलिसांना फाशी देण्यासह गंभीर परिणाम भोगावे लागतील असा इशारा अतिरेक्यांनी दिला.
“जर आमच्या मागण्या निर्धारित कालावधीत पूर्ण झाल्या नाहीत किंवा या काळात कब्जा करणाऱ्या राज्याने [पाकिस्तान] कोणत्याही लष्करी कारवाईचा प्रयत्न केला तर सर्व कैद्यांना [ओलिसांना] निष्क्रिय केले जाईल आणि ट्रेन पूर्णपणे नष्ट केली जाईल,” असे बीएलए बंडखोरांनी धमकी दिली.
“परिणामाची संपूर्ण जबाबदारी पाकिस्तानी सैन्याची असेल. ही घोषणा अंतिम आणि अपरिवर्तनीय आहे.”
