सामायिक हितसंबंध बळकट करण्यावर ट्रम्प, मोदी यांचे लक्ष : तुलसी गबार्ड

तीन दिवसांच्या भारत दौऱ्यावर आलेल्या अमेरिकेच्या राष्ट्रीय गुप्तचर विभागाच्या संचालिका तुलसी गबार्ड यांनी सोमवारी सांगितले की, दोन्ही देशांचे नेते ‘सामायिक उद्दिष्टे आणि हितसंबंध’ बळकट करण्यासाठी काम करत आहेत.

16 मार्च रोजी भारतात आलेल्या गबार्ड यांनी अमेरिकेचे राष्ट्राध्यक्ष डोनाल्ड ट्रम्प आणि भारतीय पंतप्रधान नरेंद्र मोदी एकमेकांचे ‘खूप चांगले मित्र’ असल्याचे म्हटले आहे.

“अमेरिका आणि भारत यांच्यातील संबंध खूप जुने आहेत आणि (ट्रम्प यांच्या दुसऱ्या कार्यकाळात) आम्ही त्या भागीदारीला बळकटी देत आहोत आणि शांतता, समृद्धी, स्वातंत्र्य तसेच सुरक्षिततेवर केंद्रित असलेल्या दोन्ही देशांच्या परस्पर हितसंबंधांना मान्यता देत आहोत”, असे त्यांनी एनडीटीव्हीला सांगितले.

“अमेरिकेचे राष्ट्राध्यक्ष ट्रम्प यांचे अमेरिकेतील नेतृत्व आणि अर्थात, पंतप्रधान मोदी यांचे भारतातील दीर्घकालीन नेतृत्व-आमच्यात दोन महान देशांचे दोन नेते आहेत जे खूप चांगले मित्र आहेत आणि आपण सामायिक उद्दिष्टे तसेच हितसंबंध कसे बळकट करू शकतो यावर खूप लक्ष केंद्रित केले आहे”, असे गबार्ड यांनी सोमवारी नवी दिल्लीत भारताचे संरक्षण मंत्री राजनाथ सिंह यांची भेट घेतल्यानंतर सांगितले.

सामायिक उद्दिष्टांमध्ये इस्लामी दहशतवादाप्रती दृढ वचनबद्धता देखील समाविष्ट आहे, असे गबार्ड म्हणाल्या.

दोन्ही देशांमधील शुल्क आणि व्यापारावरून निर्माण झालेल्या द्विपक्षीय तणावाच्या दरम्यान गबार्ड यांचा भारत दौरा होत आहे.

या वर्षाच्या सुरुवातीला पंतप्रधान मोदींच्या अमेरिका दौऱ्यादरम्यानही ट्रम्प यांनी भारताला निर्यात होणाऱ्या अमेरिकी वस्तूंवर आकारल्या जाणाऱ्या मोठ्या आयातशुल्काची तक्रार केली होती.

फेब्रुवारीमध्ये मोदींच्या अमेरिका दौऱ्यानंतर‌ गार्ड यांचा हा दौरा होत आहे. जिथे ते गबार्ड यांना भेटले आणि भारत-अमेरिका संबंधांच्या कट्टर समर्थक म्हणून त्यांचे वर्णन केले.

आपले आभार व्यक्त करताना गबार्ड यांनी मोदींचे स्वागत केले आणि दोन्ही देशांमधील संबंध दृढ करण्यासाठी आपल्या समर्पणाचा पुनरुच्चार केला.

डोनाल्ड ट्रम्प यांनी दुसऱ्यांदा पदभार स्वीकारल्यानंतर मोदी यांचा हा पहिलाच अमेरिका दौरा होता.

या भेटीदरम्यान, मोदी आणि ट्रम्प व्हाईट हाऊसमध्ये भेटले आणि 20 जानेवारी रोजी ट्रम्प यांनी 47 वे राष्ट्राध्यक्ष म्हणून शपथ घेतल्यानंतरच्या त्यांच्या पहिल्या अधिकृत बैठकीत त्यांनी प्रेमाने आलिंगन दिले.

ट्रम्प यांच्या नवीन प्रशासनाखालील अमेरिकेला भेट देणाऱ्या पहिल्या काही जागतिक नेत्यांपैकी मोदी हे एक होते, ज्यांना नवीन सरकारने पदभार स्वीकारल्यानंतर केवळ तीन आठवड्यांच्या आत भेटीचे निमंत्रण मिळाले होते.

टीम स्ट्रॅटन्यूज
(आयबीएनएसच्या इनपुटसह)