![](https://bharatshakti.in/wp-content/uploads/2024/03/LT-BSI-Defence.gif")
युक्रेनच्या लष्कराने मंगळवारी जाहीर केले की, त्यांनी क्रास्नोडार प्रातांतील एका रशियन तेल शुद्धीकरण प्रकल्पावर आणि नोव्होरोसियस्क बंदरातील एका तेल टर्मिनसवर हल्ला केला.
युक्रेन-रशिया मधील संघर्ष चौथ्या वर्षाकडे वाटचाल करत असताना, कीवच्या सैन्याने रशियन लक्ष्यांवरील, विशेषत: तेल सुविधांवरील आपले लांब पल्ल्याचे हल्ले वाढवले आहेत.
जनरल स्टाफने टेलिग्रामवरील एका निवेदनात म्हटले आहे की, टँकरवर तेल चढवण्यासाठी आणि उतरवण्यासाठी वापरल्या जाणाऱ्या उपकरणांवर हल्ला करण्यात आला. तसेच, बेरीयेव्ह लष्करी कारखान्यावर झालेल्या हल्ल्यादरम्यान, रशियन A-60 टेहळणी विमानालाही लक्ष्य करण्यात आल्याचेही त्यांनी सांगितले.
नौदल जहाजाच्या नुकसानाची माहिती
युक्रेनच्या एसबीयू (SBU) या देशांतर्गत सुरक्षा सेवेच्या एका अधिकाऱ्याने स्वतंत्रपणे सांगितले की, “या हल्ल्यात नोव्होरोसियस्कमधील नौदल तळाच्या धक्क्याजवळ उभ्या असलेल्या एका मोठ्या लँडिंग जहाजाचेही नुकसान झाले आहे.”
नुकसानीच्या प्रमाणाविषयी त्यांनी सविस्तर तपशील दिले नाहीत, परंतु हा हल्ला रशियन लष्करी आणि ऊर्जा पायाभूत सुविधांना लक्ष्य करणाऱ्या युक्रेनियन कारवायांच्या वाढत्या यादीत निश्चितच भर घालतो.
लांब पल्ल्याच्या हल्ल्यांमध्ये वाढ
युक्रेनने अलिकडच्या काही महिन्यांत, रशियाच्या धोरणात्मक मालमत्तेवर हल्ला करण्यासाठी लांब पल्ल्याच्या शस्त्रांचा वापर तीव्र केला आहे. यापैकी बहुतांशी हल्ल्यांमध्ये, रशियाच्या युद्ध प्रयत्नांना पुरवठा करणाऱ्या तेल शुद्धीकरण प्रकल्पांवर, गोदामांवर आणि बंदरांवर लक्ष केंद्रित करण्यात आले आहे.
या नव्या हल्ल्यांमुळे मॉस्कोचे लॉजिस्टिक्स नेटवर्क कमकुवत करण्याचे, तसेच लष्करी ऑपरेशन्ससाठी निधी आणि इंधन पुरवण्याची क्षमता कमी करण्याचे, कीवचे सततचे प्रयत्न अधोरेखित होतात.
टीम स्ट्रॅटन्यूज
(रॉयटर्सच्या इनपुट्ससह)
- Ved Barve
