पाकिस्तान: पेशावरच्या निमलष्करी मुख्यालयावर आत्मघाती हल्ला, तिघांचा मृत्यू

सोमवारी तीन आत्मघाती हल्लेखोरांनी पाकिस्तानी निमलष्करी दलाच्या मुख्यालयाला लक्ष्य केले, त्यात तीन कर्मचारी ठार झाले आणि किमान पाच जण जखमी झाले, असे अधिकाऱ्यांनी सांगितले.

 

पोलिसांनी सांगितले की, पेशावर शहरातील फ्रंटियर कॉन्स्टेब्युलरीच्या मुख्यालयात घुसून हल्लेखोरांनी गोळीबार केला आणि नंतर संकुलात स्वत:ला उडवून दिले.

निमलष्करी दलाचे डेप्युटी कमांडंट जावेद इक्बाल यांनी सांगितले की, या हल्ल्यात तीन निमलष्करी कर्मचारी ठार झाले.

हल्ल्याबाबतची माहिती

पाकिस्तानी वृत्तसंस्था ‘द एक्सप्रेस ट्रिब्यून’ने दिलेल्या वृत्तानुसार, स्फोटात जखमी झालेल्या नऊ जणांना लेडी रीडिंग रुग्णालयात हलवण्यात आले आहे, असे प्रवक्ते मोहम्मद असीम यांनी सांगितले. “जखमींची प्रकृती स्थिर आहे आणि त्यांच्यावर वैद्यकीय उपचार सुरू आहेत”. जखमींमध्ये तीन फेडरल कॉन्स्टेब्युलरी कर्मचारी आणि नागरिकांचा समावेश आहे.

“सर्व जखमी सध्या धोक्याबाहेर असून एलआरएचमध्ये आणीबाणी जाहीर करण्यात आली आहे,” असे प्रवक्त्याने पुढे सांगितले.

“पहिल्या आत्मघातकी हल्लेखोराने कॉन्स्टेब्युलरीच्या मुख्य प्रवेशद्वारावर हल्ला केला आणि इतर दोघे कंपाऊंडमधून आत घुसले,” असे एका वरिष्ठ अधिकाऱ्याने नाव न सांगण्याच्या अटीवर रॉयटर्सला सांगितले. या अधिकाऱ्याला सदर घटनेबद्दल माध्यमांशी बोलण्याचा कोणताही अधिकार नव्हता.

“सैन्य आणि पोलिसांसह कायदा अंमलबजावणी कर्मचाऱ्यांनी परिसराला वेढा घातला आहे. मुख्यालयात काही दहशतवादी असल्याचा आम्हाला संशय असल्याने परिस्थिती काळजीपूर्वक हाताळत आहेत,” असे अधिकाऱ्याने पुढे सांगितले.

कोणताही विशिष्ट धोका नाही

खैबर पख्तूनख्वा प्रांताची राजधानी असलेल्या पेशावरमधील दाट लोकवस्तीच्या भागात या दलाचे मुख्यालय आहे.

महानिरीक्षकांनी एक्सप्रेस ट्रिब्यून न्यूजला असेही सांगितले की एफसी मुख्यालयावरील हल्ल्याबाबत कोणताही विशिष्ट धोक्याचा इशारा देण्यात आला नव्हता, परंतु वेळेवर कारवाई केल्याने सुरक्षा कर्मचाऱ्यांना परिस्थिती लवकर नियंत्रणात आणता आली. आयजीने नमूद केले की प्रांताच्या दक्षिणेकडील जिल्ह्यांमध्ये अशा प्रकारचे हल्ले अलीकडेच उधळून लावण्यात आले होते आणि गेल्या आठवड्यात प्रांतातील सुरक्षा व्यवस्थेचा आढावा घेण्यात आला.

“रस्ता वाहतुकीसाठी बंद करण्यात आला आहे आणि सैन्य, पोलिस आणि (सुरक्षा) कर्मचाऱ्यांनी संपूर्ण परिसराला वेढा घातला आहे,” असे परिसरातील रहिवासी सफदर खान यांनी रॉयटर्सला सांगितले.

दोन निमलष्करी कर्मचाऱ्यांसह पाच जखमींना लेडी रीडिंग रुग्णालयात नेण्यात आले, असे त्यांचे प्रवक्ते मोहम्मद असीम यांनी सांगितले.

पंतप्रधान कार्यालयाने जारी केलेल्या निवेदनात म्हटले आहे की, पंतप्रधान शेहबाज शरीफ यांनी दहशतवादी हल्ल्याचा तीव्र निषेध केला आणि सुरक्षा दलांनी “वेळेवर केलेल्या कारवाईबद्दल” त्यांचे कौतुक केले, असे वृत्त डॉनने दिले आहे.

सातत्याने होणारे हल्ले

आतापर्यंत कोणत्याही दहशतवादी गटाने या हल्ल्याची जबाबदारी स्वीकारलेली नाही.

पाकिस्तानमध्ये अलिकडच्या काळात झालेल्या आत्मघातकी बॉम्बस्फोटांच्या मालिकेतील हा आणखी एक नवा हल्ला आहे. 11 नोव्हेंबर रोजी पाकिस्तानची राजधानी इस्लामाबादमधील स्थानिक न्यायालयाबाहेर झालेल्या आत्मघातकी बॉम्बस्फोटात किमान 12 जण ठार झाले आणि अनेक जण जखमी झाले.

गेल्या महिन्यात पाकिस्तान आणि अफगाणिस्तानमधील घातक सीमा संघर्षानंतर अलिकडच्या आठवड्यांमध्ये या प्रदेशात कार्यरत असलेल्या इस्लामी दहशतवाद्यांनी हल्ले वाढवले ​​आहेत.

पाकिस्तान अफगाण तालिबानवर सीमापार हल्ले करणाऱ्या अतिरेक्यांना आश्रय देण्याचा आरोप करतो. तर हा आरोप काबुलने नाकारला आहे.

टीम स्ट्रॅटन्यूज
(रॉयटर्सच्या इनपुट्ससह)