जपान: पंतप्रधान इशिबा यांनी केले ऑटो टॅरिफ कराराचे समर्थन

जपानचे पंतप्रधान शिगेरू इशिबा यांनी सोमवारी सांगितले की, ते अमेरिकेचे अध्यक्ष डोनाल्ड ट्रम्प यांच्याशी चर्चा करण्यास मागेपुढे पाहणार नाहीत जेणेकरून अमेरिकेच्या वाहन टॅरिफमधील मान्य कपात लवकरात लवकर अंमलात आणली जाईल.

गेल्या महिन्यात व्यापार करार करण्यासाठी अमेरिकेबरोबर अधिकृत दस्तऐवजावर स्वाक्षरी न केल्याबद्दल सोमवारी संसदेच्या अधिवेशनात काही विरोधी खासदारांकडून इशिबा यांच्यावर टीका करण्यात आली.

‘ते सामान्य राष्ट्राध्यक्ष नाहीत’

“दस्तऐवज तयार होण्याची वाट बघितली असतील तर टॅरिफ कपातीच्या वेळेस विलंब होऊ शकला असता. ती आमची सर्वात मोठी भीती होती,” असे अमेरिकेबरोबर अधिकृत दस्तऐवज तयार न करता करारावर सहमत होण्याच्या जपानच्या निर्णयाचे समर्थन करताना इशिबा म्हणाले.

“ते एक सामान्य समकक्ष नाही आणि कधीही नियम उलटवू शकतात,” असे  इशिबा ट्रम्प यांच्यासोबतच्या वाटाघाटींवरील शैलीबाबत म्हणाले.

इशिबा यांनी सांगितले की, वॉशिंग्टनकडून लवकरात लवकर टॅरिफ कपात अंमलात आणण्यासाठी ट्रम्प यांच्याशी चर्चा करण्यात आपल्याला अजिबात संकोच वाटत नाही, मात्र अशी चर्चा केव्हा होऊ शकते यावर भाष्य करण्यास त्यांनी नकार दिला.

“दोन्ही देश ज्या गोष्टीवर सहमती झाली होती त्याची अंमलबजावणी सुरू करतील, जे करारावर सहमती होण्यापेक्षा कठीण आहे”, असेही इशिबा म्हणाले, यातून ही प्रक्रिया पार पाडण्यासाठी पंतप्रधानपदी राहण्याचा त्यांचा हेतू स्पष्टपणे दिसून येतो.

मोठा दबाव

इशिबा यांच्यावर त्यांच्या सत्ताधारी लिबरल डेमोक्रॅटिक पक्षाकडून गेल्या महिन्यात झालेल्या वरच्या सभागृहाच्या निवडणुकीत पक्षाच्या मोठ्या पराभवाची जबाबदारी स्वीकारण्यासाठी पंतप्रधानपदाचा राजीनामा देण्याचा दबाव आहे.

गेल्या महिन्यात ट्रम्प यांच्याशी झालेल्या जपानच्या व्यापार करारामुळे अमेरिकेने ऑटोमोबाईल्ससह वस्तूंच्या आयातीवरील शुल्क कमी केले, ज्यामुळे निर्यातीवर अवलंबून असलेल्या अर्थव्यवस्थेवरील भार कमी झाला.

परंतु ऑटोमोबाईल्स आणि ऑटो पार्ट्सवरील अमेरिकन टॅरिफ सध्याच्या 25 टक्क्यांवरून 15 टक्क्यांपर्यंत कधी कमी केले जाईल याबद्दल कोणतीही स्पष्टता नाही, ज्यामुळे जपानच्या अत्यंत नाजूक अर्थव्यवस्थेबाबतचा दृष्टीकोन अस्पष्ट आहे.

याच संसदेच्या अधिवेशनात, जपानचे सर्वोच्च व्यापार वाटाघाटी करणारे रियोसेई अकाझावा म्हणाले की, ब्रिटनच्या बाबतीत “एका महिन्यापेक्षा जास्त” वेळ लागला असला तरी अमेरिका प्रत्यक्षात वाहन शुल्क किती लवकर लागू करू शकेल हे सांगणे कठीण आहे.

टीम स्ट्रॅटन्यूज
(रॉयटर्सच्या इनपुट्ससह)