इस्रायलने रविवारी, येमेनची राजधानी साना येथे तीव्र हवाई हल्ले केले. हे हल्ले, हौथी गटाच्या क्षेपणास्त्र हल्ल्यांना प्रत्युत्तर देण्यासाठी करण्यात आले असून, यामध्ये 6 जणांचा मृत्यू झाला आणि 86 जखमी झाल्याची माहिती, हौथीच्या एका आरोग्य अधिकाऱ्याने दिली.
हे हल्ले, गेल्या एक वर्षांपासून सुरू असलेल्या इस्रायल आणि हौथी लढवय्यांमधील थेट संघर्षांचा एक भाग आहेत, जे गाझा युद्धाच्या पार्श्वभूमीवर उभे राहिले आहेत.
मुख्य टार्गेट्स
इस्रायलच्या या हवाई हल्ल्यांमध्ये, सानामधील एक लष्करी तळ (ज्यात राष्ट्रपती भवन होते), दोन वीज केंद्रे आणि एक इंधन साठवणीचे केंद्र, या मुख्य टार्गेट्सचा समावेश होता, अशी माहिती त्यांच्या लष्कराने दिली. या हल्ल्यांमध्ये एकूण 6 जण ठार झाले असून, 86 जखमी झाल्याचे हौथी आरोग्य मंत्रालयाच्या प्रवक्त्याने X (पूर्वीचे ट्विटर) द्वारे सांगितले.
इस्रायली लष्कराच्या निवेदनानुसार, “गेल्या काही दिवसांत- हौथी दहशतवादी गटाने इस्रायल आणि इस्रायली नागरिकांवर पृष्ठभागावरुन पृष्ठभागावर मारा करणारी क्षेपणास्त्रे आणि ड्रोनद्वारे केलेल्या सततच्या हल्ल्यांच्या प्रत्युत्तरात, हे हवाई हल्ले करण्यात आले.”
पहिल्यांदाच वापरलेले क्षेपणास्त्र
शुक्रवारी, हौथी गटाने इस्रायलकडे एक बॅलिस्टिक क्षेपणास्त्र डागल्याचा दावा केला, ज्याला त्यांनी गाझामधील पॅलेस्टिनी जनतेच्या समर्थनार्थ केलेले असल्याचे म्हटले. इस्रायली हवाई दलाच्या अधिकाऱ्याने रविवारी सांगितले की, “हे क्षेपणास्त्र अनेक उपस्फोटके घेऊन आले असावे, जे धडकेतच स्फोट होण्यासाठी डिझाइन करण्यात आले होते.”
या अधिकाऱ्याने स्पष्ट केले की, “येमेनमधून अशा प्रकारचे क्षेपणास्त्र प्रथमच डागले गेले आहे.”
गाझा संघर्षामुळे प्रादेशिक तणावात वाढ
ऑक्टोबर 2023 मध्ये, इस्रायल आणि पॅलेस्टिनी अतिरेकी गट हमास यांच्यात गाझामध्ये युद्ध सुरू झाल्यानंतर, इराण-समर्थक हौथी गटाने लाल समुद्रातील जहाजांवर हल्ले सुरू केले. त्यांनी हे हल्ले पॅलेस्टिनी जनतेप्रती ऐक्य दर्शविण्यासाठी केले असल्याचे सांगितले.
हौथींनी वारंवार इस्रायलकडे क्षेपणास्त्रे डागली आहेत, जरी त्यापैकी बहुतांश प्रतिबंधित करण्यात आली आहेत. इस्रायलने प्रत्युत्तरादाखल हौथी नियंत्रित येमेनमधील भागांवर, त्यात महत्त्वाचा होदेदाह बंदर सुद्धा समाविष्ट आहे, हवाई हल्ले केले आहेत.
अब्दुल कादर अल-मुर्तदा, हे हौथी गटाचे वरिष्ठ नेते, यांनी रविवारी सांगितले की, “आम्ही येमेनमधील बहुतेक लोकसंख्या नियंत्रित करतो आणि गाझातील पॅलेस्टिनी जनतेशी ऐक्य दर्शविण्याचे आमचे कृतीतून समर्थन सुरूच राहील.”
त्यांनी X पोस्टमध्ये लिहिले की: “(इस्रायलने) हे समजून घ्यायला हवे की, आम्ही गाझातील आमच्या बांधवांना कधीही सोडून देणार नाही, मग त्यासाठी कितीही बलिदान द्यावे लागले तरीही…”
टीम स्ट्र्रॅटन्यूज
(रॉयटर्सच्या इनपुट्ससह)


























