इराणचा दुबई बंदरातील कुवेती टँकरवर हल्ला

सोमवारी दुबई बंदरात उभ्या असलेल्या आणि इराणच्या हल्ल्यात लक्ष्य झालेल्या, कुवेती तेल टँकरला लागलेली आग विझवण्यात आल्याचे अधिकाऱ्यांनी सांगितले. हा टॅंकर कच्च्या तेलाने पूर्णपणे भरलेला होता. या हल्ल्यामुळे जहाजाच्या तळाचे नुकसान झाले असू, संभाव्य तेल गळतीबद्दलची चिंता वाढली आहे.

28 फेब्रुवारी रोजी अमेरिका आणि इस्रायलने इराणवर हल्ला केल्यापासून, आखात आणि होर्मुझच्या सामुद्रधुनीमध्ये व्यापारी जहाजांवर क्षेपणास्त्रे किंवा स्फोटक हवाई आणि सागरी ड्रोनद्वारे होणाऱ्या हल्ल्यांच्या मालिकेत ‘अल सालमी’ टँकरवरील हा हल्ला आता समाविष्ट झाला आहे.

कुवेत पेट्रोलियम कॉर्पोरेशनने (केपीसी) मंगळवारी सकाळी सांगितले की, संयुक्त अरब अमिरातीमधील दुबई बंदरात नांगरलेल्या ‘अल सालमी’ जहाजावर इराणने हल्ला केला, ज्यामुळे जहाजाचे नुकसान झाले आणि जहाजावर आग लागली. आजूबाजूच्या पाण्यात संभाव्य तेल गळती होईल असा इशारा देण्यात आल्याचे कुवेती सरकारी वृत्तसंस्था ‘कुना’ने (KUNA) वृत्त दिले आहे.

ब्रेंट क्रूड उच्चांकी पातळीवर

दुबई प्रशासनाने सांगितले की, ड्रोन हल्ल्यामुळे लागलेली आग सागरी अग्निशमन पथकांनी यशस्वीरित्या विझवली असून, ते परिस्थितीचा आढावा घेत आहेत. या घटनेत कोणीही जखमी झाले नसून सर्व 24 कर्मचारी सुरक्षित आहेत, असेही प्रशासनाने सांगितले.

दुबईतील टँकरवरील हल्ल्याच्या बातमीनंतर आशियाई व्यवहारांच्या सुरुवातीला ब्रेंट क्रूड फ्युचर्स (LCOc1) 2% पेक्षा जास्त वाढून प्रति बॅरल $115.17 वर पोहोचले होते. परंतु, वॉल स्ट्रीट जर्नलने दिलेल्या वृत्तानुसार, होर्मुझची सामुद्रधुनी बंद राहिली तरीही अध्यक्ष डोनाल्ड ट्रम्प युद्ध संपवण्यास तयार आहेत, हे वृत्त प्रसिद्ध झाल्यानंतर त्यात थोडी घसरण झाली.

मध्यपूर्वेतील युद्धामुळे ब्रेंट क्रूड मार्च महिन्यात 59% वाढीच्या मार्गावर आहे, जी आतापर्यंतची सर्वात मोठी मासिक वाढ असेल.

टँकरच्या नुकसानीचे मूल्यांकन करण्याचे काम सुरू आहे, असे केपीसीने सांगितले. लॉयड्स लिस्ट इंटेलिजन्सच्या माहितीनुसार, केपीसी ही अल सालमीच्या नोंदणीकृत मालक आणि व्यावसायिक ऑपरेटरची मूळ कंपनी आहे.

लॉइड्स आणि टँकरट्रॅकर्सच्या माहितीनुसार, टँकरमध्ये कुवेत आणि सौदी अरेबियामधून 20 लाख बॅरल तेल भरण्यात आले होते. लॉइड्सने चीनमधील किंगदाओ हे गंतव्यस्थान नमूद केले आहे.

प्रतिक्रियेसाठी इराणी अधिकाऱ्यांशी तात्काळ संपर्क साधता आला नाही.

अज्ञात क्षेपणास्त्रे

सोमवारी सकाळी, सौदी अरेबियाच्या रास तानुराच्या किनाऱ्याजवळ असलेल्या एका ग्रीक मालकीच्या कंटेनर जहाजाजवळ पाण्यात क्षेपणास्त्रे आदळल्याच्या दोन वेगवेगळ्या घटनांची माहिती सागरी सुरक्षा तज्ज्ञांनी दिली.

लायबेरियन ध्वज असलेल्या ‘एक्सप्रेस रोम’च्या एका प्रतिनिधीने, रास तानुराच्या ईशान्येस सुमारे 22 नॉटिकल मैल (40.7 किमी) अंतरावर, 13.52 GMT वाजता कंटेनर जहाजाजवळ पाण्यात दोन अज्ञात क्षेपणास्त्रे आदळल्याची माहिती दिली. या दोन्ही घटना एका तासाच्या अंतराने घडल्या आणि जहाजावरील कर्मचारी सुरक्षित असल्याची माहिती ब्रिटिश सागरी जोखीम-व्यवस्थापन गट ‘व्हॅनगार्ड’ने दिली.

‘इस्लामिक रिव्होल्यूशनरी गार्ड कॉर्प्स’ने यापूर्वी 11 मार्च रोजी ‘एक्सप्रेस रोम’वर हल्ला केल्याचा दावा केला होता, असे ‘व्हॅनगार्ड’ने म्हटले आहे.

‘एक्सप्रेस रोम’च्या ऑपरेटरने तात्काळ कोणतीही प्रतिक्रिया दिली नाही.

तेल टँकरवरील हल्ल्याची किंवा क्षेपणास्त्रांची जबाबदारी कोणत्याही गटाने स्वीकारलेली नाही.

टीम स्ट्रॅटन्यूज
(रॉयटर्सच्या इनपुट्ससह)