हेरिटेज फाउंडेशनचा ट्रम्प यांच्या राष्ट्रीय सुरक्षा धोरणावर किती प्रभाव आहे?

अमेरिकेतील विविध थिंक टँक्स राजकीय पक्षांच्या विचारसरणीवर आणि मार्गदर्शनावर मोठा प्रभाव टाकत असतात. त्यापैकी काही रिपब्लिकन पक्षाशी संलग्न आहेत, तर काही डेमोक्रॅट पक्षाशी.

हेरिटेज फाउंडेशन ही एक अशी थिंक टँक आहे जी पहिल्या पक्षाकडे म्हणजे रिपब्लिकनकडे झुकलेली आहे आणि असा एक समज आहे की राष्ट्राध्यक्ष ट्रम्प यांच्या अलीकडील राष्ट्रीय सुरक्षा धोरणाच्या दस्तऐवजावर या फाउंडेशनचा मोठा प्रभाव आहे.

तक्षशिला संस्थेतून अमेरिकेचा अभ्यास करणारे ब्रिगेडियर अनिल रमण (निवृत्त) यांनी ‘द जिस्ट’ला दिलेल्या मुलाखतीत सांगितले की, “हेरिटेज (फाउंडेशन) प्रामुख्याने देशांतर्गत अजेंड्यावर खूप लक्ष केंद्रित करते. ते आंतरराष्ट्रीय संबंधांकडेही  बघते, मात्र ते मोठ्या प्रमाणात त्यांच्या देशांतर्गत अजेंड्याद्वारे प्रेरित असतात आणि हेच तुम्हाला या दस्तऐवजात व्यक्त झालेले दिसते.”

हेरिटेज ज्या विचारसरणींचा प्रचार करते, त्यापैकी एक म्हणजे अर्थातच मुक्त उद्योग, बाजार-आधारित अर्थव्यवस्था सर्वोत्तम आहे. त्यानंतर, ते पुन्हा मर्यादित सरकारवर विश्वास ठेवते. हे तुम्हाला रिपब्लिकन पक्षाच्या विधानांमध्ये प्रतिबिंबित झालेले दिसते. आणि अर्थातच, वैयक्तिक स्वातंत्र्यही.

त्यानंतर नंबर येतो तो पारंपरिक अमेरिकन मूल्यांचा, ज्यात ख्रिश्चन पैलूंवर खूप जोर दिला जातो. त्यामुळे हे असे ठिकाण आहे जिथे इव्हँजेलिकल ख्रिश्चन लोक रिपब्लिकन पक्षाचा एक प्रकारे मतदान गट तयार करतात. ते मजबूत राष्ट्रीय संरक्षणाचेही पुरस्कर्ते आहेत.

रमन यांच्या मते, या कल्पना ट्रम्प यांच्या पहिल्या कार्यकाळातही होत्या, पण ते त्यांची अंमलबजावणी करू शकले नाहीत. त्यांच्या आजूबाजूला असे लोक होते ज्यांनी त्यांना त्यांचा अजेंडा राबवण्यापासून रोखले. पण आज परिस्थिती वेगळी आहे, जेव्हा असे निर्बंध अस्तित्वात नाहीत.

स्पष्टपणे देशांतर्गत प्राधान्यांवर लक्ष केंद्रित केले जात आहे. आघाड्या कमकुवत केल्या जात आहेत, पश्चिम गोलार्धाला प्रोत्साहन दिले जात आहे आणि व्यवहारवादाला केंद्रस्थानी आणले जात आहे.

स्थलांतराविषयीची गोष्टही तशीच आहे. दक्षिण अमेरिका आणि लॅटिन अमेरिकेवर लक्ष केंद्रित करणे, यामागे हेच कारण आहे.

“स्थलांतराचा उल्लेख कदाचित पूर्वी झाला असेल, पण सध्याच्या विश्लेषणात जे समोर आले आहे, त्यानुसार हेरिटेज दस्तऐवजात याचा अगदी स्पष्ट उल्लेख आहे, स्थलांतराला दिलेले प्राधान्य, दक्षिणेकडील सीमेवरील सीमा नियंत्रणाला दिलेले प्राधान्य. स्थलांतराला मुख्य आणि सर्वात गंभीर राष्ट्रीय सुरक्षा धोक्याचा दर्जा देण्यात आला आहे.”

तक्षशिला संस्थेचे ब्रिगेडियर अनिल रमण (निवृत्त) यांच्यासोबत झालेल्या या संभाषणाचा संपूर्ण व्हिडिओ बघण्यासाठी खालील माहितीवर क्लिक करा –