रशियाच्या संरक्षण मंत्रालयाने, गेल्या 24 तासांत युक्रेनने रशियन ऊर्जा पायाभूत सुविधांवर सहा हल्ले केल्याचा दावा केला आहे. हे हल्ले अमेरिकेच्या मध्यस्थीखाली झालेल्या ऊर्जा पायाभूत सुविधा न लक्ष करत करण्याच्या कराराचे उल्लंघन असल्याचेही मंत्रालयाने नमूद केले.
गेल्या महिन्यात युक्रेन आणि रशियाने एकमेकांच्या ऊर्जा सुविधांवर हल्ले न करण्याचा करार केला होता. मात्र, दोन्ही बाजूंनी सतत एकमेकांवर हा करार तोडल्याचा आरोप केला आहे.
टेलिग्रामवर दिलेल्या निवेदनात, रशियन संरक्षण मंत्रालयाने सांगितले की, कीवने रशियाच्या रोस्तोव्ह आणि कुर्स्क भागातील तसेच युक्रेनमधील झापोरीझिया या रशियन-नियंत्रित भागातील ऊर्जा पायाभूत सुविधांचे नुकसान केले आहे.
रशियाच्या क्रास्नोदार भागात युक्रेनने दोन हल्ल्यांचा प्रयत्न केला, ज्यामध्ये ब्लॅक सीमार्गे रशियातून तुर्कस्तानला गॅस पाठवणाऱ्या TurkStream पाइपलाइनच्या कॉम्प्रेसर स्टेशनवरही लक्ष्य ठेवण्यात आले होते. हे दोन्ही हल्ले अपयशी ठरले, असेही मंत्रालयाने स्पष्ट केले.
युक्रेनने मंगळवारच्या रात्री मोठ्या प्रमाणात ड्रोन हल्ला केला होता, ज्यामुळे रशियाच्या दक्षिणेकडील भागात उड्डाण सेवा विस्कळीत झाली आणि रोस्तोव्ह भागातील काही इमारतींमधील रहिवाशांना सुरक्षिततेसाठी बाहेर काढण्यात आले, असे रशियन अधिकाऱ्यांनी सांगितले.
रशियन संरक्षण मंत्रालयाच्या मते:
एकूण 158 युक्रेनियन ड्रोन नष्ट करण्यात आले.
त्यापैकी 29 ड्रोन रोस्तोव्ह भागात होते
69 ड्रोन क्रास्नोदार (उत्तर कॉकस भागात) येथे होते
आणि 15 ड्रोन उत्तर ओसेशिया-अलानिया या रशियाच्या दक्षिणेकडील भागात नष्ट करण्यात आले.
रोस्तोव्हमधील अक्साय शहरात, एका इमारतीतील एकूण 48 अपार्टमेंटमधील रहिवाशांना, एका ड्रोनच्या स्फोटाच्या शक्यतेमुळे तात्काळ स्थलांतरित करण्यात आले, अशी माहिती त्या भागातील कार्यकारी गव्हर्नरने दिली.
रशियाची नागरी विमान वाहतूक संस्था Rosaviatsia ने सांगितले की, हल्ल्यांच्या पार्श्वभूमीवर दक्षिण रशियातील अनेक विमानतळ बुधवारच्या सकाळी बंद ठेवण्यात आले, जेणेकरून हवाई सुरक्षेची खात्री होऊ शकेल.
युक्रेनकडून या हल्ल्यांबाबत कोणतीही त्वरित प्रतिक्रिया मिळालेली नाही. दोन्ही देश सांगतात की, त्यांच्या हल्ल्यांचा उद्देश फक्त युद्धसंबंधी महत्त्वाच्या पायाभूत सुविधांचे नुकसान करणे आहे.
कीवने असा दावा केला आहे की, रशियाने गेली तीन वर्षांहून अधिक काळ युक्रेनवर सतत बॉम्बहल्ले सुरू ठेवले असून, याचेच उत्तर म्हणून हे हल्ले सुरू आहेत.
अमेरिकेचे अध्यक्ष डोनाल्ड ट्रम्प, ज्यांनी जानेवारीत पदभार स्विकारताना, 24 तासांत युद्ध संपवण्याचे आश्वासन दिले होते, त्यांनी या संघर्षाचा अंत करण्यासाठी प्रयत्न सुरू केले आहेत. मार्चच्या शेवटी, अमेरिका, रशिया आणि युक्रेन यांच्यात दोन शस्त्रसंधी करार झाले होते, ज्यामध्ये एक करार ऊर्जा पायाभूत सुविधांवर हल्ला न करण्यासंदर्भात होता.
(रॉयटर्सच्या इनपुटसह)
