“शांततेसाठी युक्रेनला काही काळापुरता आपला भूभाग सोडावा लागू शकतो,” असे वक्तव्य कीवचे महापौर आणि माजी वर्ल्ड हेवीवेट बॉक्सिंग चॅम्पियन विटाली क्लिस्त्को, यांनी बीबीसीला दिलेल्या मुलाखतीदरम्यान केले.
“शांतता प्रस्थापित करण्यासाठी स्वत:चा भूभाग देणे… हे योग्य आहे असे नाही पण तात्पुरत्या शांततेसाठी, कदाचित ही एक शक्यता असू शकते,” असे क्लिस्त्को म्हणाले.
क्लिस्त्को म्हणाले की, “राष्ट्राध्यक्ष व्होलोदिमीर झेलेन्स्की यांना शांततेसाठी हा ‘दु:खद निर्णय’ घ्यावा लागू शकतो, अर्थात युक्रेनचे नागरिक रशियाच्या अतिक्रमणाला कधीही मान्यता देणार नाहीत.”
झेलेन्स्की यांचे राजकीय प्रतिस्पर्धी असलेले क्लिस्त्को, यांनी यावर्षच्या सुरुवातीला राष्ट्राध्यक्षांच्या गोटावर राजकीय कटकारस्थानांचा आरोप केला होता.
गुरुवारी रात्री रशियाने, क्षेपणास्त्र आणि ड्रोनच्या सहाय्याने कीववर भीषण हल्ला केला, ज्यामध्ये किमान 12 लोकांचा मृत्यू झाला. हा 2025 मधील आतापर्यंतचा सर्वात मोठा हल्ला होता.
झेलेन्स्की यांनी सांगितले की, “उत्तर कोरियाने बनवलेले KN-23 (KN-23A) क्षेपणास्त्र कीवच्या Sviatoshynskyi जिल्ह्यातील एका निवासी इमारतीवर आदळले.”
“प्राथमिक माहितीनुसार, रशियन सैन्याने हल्ल्यासाठी उत्तर कोरियामध्ये बनवलेले बॅलेस्टिक क्षेपणास्त्र वापरले आहे. आपली विशेष यंत्रणा याबाबत अधिक तपासणी करत आहे,” असे झेलेन्स्की यांनी X पोस्टमध्ये लिहिले.
रशियाने झेलेन्स्की यांच्या या विधानावर कोणतीही प्रतिक्रिया दिली नाही. रशिया आणि उत्तर कोरियाने यापूर्वी संयुक्त राष्ट्रांच्या शस्त्र-प्रतिबंध उल्लंघन करणाऱ्या कोणत्याही व्यवहारांना नकार दिला होता.
रशियाच्या युक्रेनवरील आक्रमणानंतर आंतरराष्ट्रीय स्तरावर, मॉस्को व प्योंगयांगमध्ये लष्करी सहकार्य वेगाने वाढले.
युक्रेनच्या म्हणण्यानुसार, उत्तर कोरियाने रशियाला मोठ्या प्रमाणात तोफखाने, रॉकेट सिस्टम, हजारो सैनिक आणि बॅलिस्टिक क्षेपणास्त्र पुरवली आहेत. 2023 च्या शेवटी रशियाने ही क्षेपणास्त्रे युक्रेनविरोधात वापरायला सुरुवात केली.
2025 च्या सुरुवातीपर्यंत, उत्तर कोरियाने रशियाला 148 KN-23 आणि KN-24 बलिस्टिक क्षेपणास्त्रे दिल्याचे, युक्रेनच्या गुप्तचर यंत्रणेने सांगितले आहे.
KN-23 क्षेपणास्त्रे सुमारे 1 टन वजनाच्या वॉरहेडने सुसज्ज असतात, जे रशियन समकक्ष क्षेपणास्त्रांपेक्षा अधिक प्रबळ आहेत, असे युक्रेनी सूत्रांनी सांगितले.
कीवच्या सुरुवातीच्या अहवालानुसार, या हल्ल्यात एकूण 7 बलिस्टिक क्षेपणास्त्रांचा वापर झाला, त्यांना Iskander-M/KN-23 असे वर्गीकृत करण्यात आले.
उत्तर कोरियाचा या युद्धातील सहभाग, युरोपमधील राजधानींसह दक्षिण कोरिया आणि आशियातील मित्र देशांमध्येही चिंता निर्माण करत आहे. कारण, या युद्धातून घेतलेले धडे एक दिवस त्यांच्याच विरोधात वापरले जाऊ शकतात, अशी भीती व्यक्त केली जात आहे.
टीम भारतशक्ती
(रॉयटर्सच्या इनपुट्ससह)
