अमेरिका-भारत व्यापार चर्चा अंतिम टप्प्यात, जुलैपर्यंत करार शक्य: लुटनिक

अमेरिका आणि भारत यांच्यातील व्यापार चर्चा प्रगतीपथावर असून लवकरच अंतिम करार होऊ शकतो, असे अमेरिकेचे वाणिज्य सचिव हॉवर्ड लुटनिक यांनी सोमवारी सांगितले. दोन्ही देश जुलैच्या अंतिम मुदतीपूर्वी वाटाघाटी पूर्ण करण्यासाठी काम करत आहेत.

“तुम्ही अमेरिका आणि भारत यांच्यात (नजीकच्या) भविष्यात करार होण्याची अपेक्षा करावी कारण मला वाटते की आम्हाला दोन्ही देशांसाठी खरोखर उपयुक्त अशी जागा सापडली आहे,” असे लुटनिक यांनी वॉशिंग्टनमधील अमेरिका-भारत धोरणात्मक भागीदारी मंचाच्या वार्षिक शिखर परिषदेत सांगितले.

‘उत्तम संबंध’

लुटनिक यांनी नंतर सोशल मीडिया प्लॅटफॉर्म एक्सवर त्यांच्या वक्तव्याचा एक छोटासा व्हिडिओ पोस्ट केला, ज्यामध्ये ते म्हणाले, “आमच्या दोन्ही देशांमधील संबंध चांगले आहेत. लवकरच दोन्ही देशांना फायदा होईल अशा व्यापार करारासाठी मी आशावादी आहे.”

रॉयटर्सने आधी वृत्त दिले होते की ट्रम्प प्रशासनाने व्यापार भागीदारांना बुधवारपर्यंत त्यांचे सर्वोत्तम प्रस्ताव सादर करण्यास सांगितले आहे, कारण अधिकारी ९ जुलैची स्वयंघोषित अंतिम मुदतीपूर्वी अनेक करारांना अंतिम रूप देण्याच्या दिशेने काम करत आहेत.

भारताच्या व्यापार मंत्रालयाने वेळेसंदर्भात भाष्य करण्यास नकार दिला.

अर्थात, अमेरिकेसोबतच्या चर्चेसाठी भारताचे मुख्य वाटाघाटी करणारे राजेश अग्रवाल यांनी गेल्या आठवड्यात सांगितले होते की दोन्ही देशांमधील व्यापार चर्चा चांगली प्रगती करत असून लवकरच “चांगले निकाल” अपेक्षित आहेत.

अमेरिकन शिष्टमंडळाचा भारत दौरा

पुढील चर्चेसाठी अमेरिकेचे एक व्यापारी शिष्टमंडळ 5 – 6 जून रोजी नवी दिल्लीला भेट देणार आहे.

याआधी एप्रिलमध्ये भारतीय पथकाने वॉशिंग्टनला भेट दिली होती. भारताचे वाणिज्यमंत्री पियुष गोयलही गेल्या महिन्यात व्यापार चर्चा पुढे नेण्यासाठी अमेरिका भेटीवर आले होते.

लुटनिक म्हणाले की, वॉशिंग्टन भारतासोबतची व्यापारी तूट कमी करण्याच्या उद्देशाने, विशेषतः कृषी उत्पादनांवर कमी शुल्क, अमेरिकन कंपन्यांसाठी अधिक बाजारपेठ प्रवेश आणि संरक्षण उपकरणांची खरेदी वाढवू इच्छित आहे.

त्या बदल्यात, ते भारतीय निर्यातीसाठी प्रवेश वाढविण्यास तयार  होते.

‘अत्यंत व्यापार संरक्षणवादी देश’

“भारत हा एक मोठा व्यापार संरक्षणवादी देश आहे,” असे म्हणत त्यांनी काही उत्पादनांवर 100 टक्क्यांपर्यंतच्या कर आकारणीकडे लक्ष वेधले. “आम्हाला आमच्या व्यवसायांना वाजवी बाजारपेठ उपलब्ध व्हावी असे वाटते.”

त्यांनी सांगितले की राष्ट्राध्यक्ष डोनाल्ड ट्रम्प आणि पंतप्रधान नरेंद्र मोदी यांच्यातील मजबूत संबंध वाटाघाटी सुलभ करण्यास मदत करत आहेत.

टीम स्ट्रॅटन्यूज
(रॉयटर्सच्या इनपुट्ससह)