![](https://bharatshakti.in/wp-content/uploads/2024/03/LT-BSI-Defence.gif")
भारताची ‘कोचीन शिपयार्ड लिमिटेड (CSL)‘ आणि दक्षिण कोरियाची ‘एचडी कोरिया शिपबिल्डिंग अँड ऑफशोअर इंजिनीअरिंग कंपनी लिमिटेड (KSOE)’ या दोन कंपन्यांनी, जागतिक सागरी उद्योगातील दीर्घकालीन सहकार्य वाढवण्यासाठी एक व्यापक सामंजस्य करार (MoU) केला आहे.
शुक्रवारी सीएचएल कंपनीने या करारावर स्वाक्षरी केली असून, या करारात संयुक्त जहाजबांधणी प्रकल्प, प्रगत तांत्रिक ज्ञानाची देवाणघेवाण, मनुष्यबळ क्षमतेत वाढ आणि समुद्री कार्यक्षमता सुधारण्यासाठी परस्पर सहकार्याचा समावेश आहे. याशिवाय, यामध्ये मरीन इंजिनीअरिंग आणि ऑफशोअर इन्फ्रास्ट्रक्चर संबंधित नव्या उपक्रमांचा शोध घेण्यात येणार आहे.
कोचीन शिपयार्ड लिमिटेड (CSL), भारतातील आघाडीची जहाज निर्मिती कंपनी आहे. जटिल जहाजांची बांधणी करण्याचा मोठा अनुभव असलेल्या या कंपनीने, भारताचे पहिले स्वदेशी विमानवाहू जहाज देखील तयार केले आहे. गेल्या काही वर्षांत कोचीन शिपयार्डने युरोप, अमेरिका आणि मध्य पूर्वेतील ग्राहकांना यशस्वीरित्या जहाजांचे वितरण केले आहे. भारताच्या हरित जहाजबांधणी आणि किनारी जहाजविकास उपक्रमांमध्येही या कंपनीने महत्त्वाचे योगदान दिले आहे.
दुसरीकडे, KSOE ही जहाजबांधणी क्षेत्रातील जागतिक अग्रणी कंपनी आहे, जी Hyundai Heavy Industries आणि Hyundai Mipo Dockyard यांसारख्या प्रमुख शिपयार्ड्सचे संचालन करते. ही दक्षिण कोरियन कंपनी व्यावसायिक आणि नौदल जहाज डिझाइन तसेच ऑफशोअर प्लॅटफॉर्म्सच्या अभियांत्रिकी कौशल्यासाठी ओळखली जाते.
“ही भागीदारी भारताच्या जहाजबांधणी प्रणालीचे जागतिकीकरण करण्याच्या दिशेने एक महत्त्वपूर्ण पाऊल आहे,” असे कोचीन शिपयार्ड लिमिटेडच्या प्रवक्त्याने सांगितले. “तज्ज्ञतेची देवाणघेवाण आणि संयुक्त प्रकल्पांद्वारे, आपण केवळ सागरी क्षमतेत वाढ करत नाहीयोत, तर राष्ट्रीय सागरी विकासाच्या उद्दिष्टावरही भर देत आहोत,” असेही ते म्हणाले.
ही भागीदारी, भारताच्या Maritime India Vision 2030 आणि Maritime Amrit Kaal Vision 2047 या व्यापक योजना अधिक बळकट करते, ज्यांचा उद्देश भारताला जागतिक समुद्री केंद्र म्हणून उभे करणे आहे. या योजनांना भरीव सार्वजनिक गुंतवणुकीचा पाठिंबा आहे, ज्यामध्ये अलीकडे सुरू करण्यात आलेला 25,000 कोटी रुपयांचा सागरी विकास निधी (Maritime Development Fund) अंतर्भूत आहे.
उद्योग तज्ज्ञांच्या मते, हा सामंजस्य करार भारताच्या संरक्षण व व्यावसायिक जहाजबांधणीतील आत्मनिर्भरतेला चालना देऊ शकतो, तसेच कोचीन शिपयार्ड आणि KSOE या दोघांसाठी नव्या आंतरराष्ट्रीय बाजारपेठाही खुल्या करू शकतो.
टीम भारतशक्ती
