जपानमध्ये 6.2 तीव्रतेचा शक्तिशाली भूकंप, त्सुनामीचा कोणताही इशारा नाही

मंगळवारी जपानच्या पश्चिम चुगोकू प्रदेशात 6.2 तीव्रतेचा भूकंप झाला असून त्यानंतर अनेक मोठे भूकंपाचे धक्के जाणवल्याचे जपानच्या हवामानशास्त्र संस्थेने (JMA) सांगितले आहे.

पहिल्या भूकंपाचा केंद्रबिंदू शिमाने प्रांताच्या पूर्वेकडील भागात होता, असे सांगत त्सुनामीचा कोणताही धोका नसल्याचेही संस्थेने स्पष्ट केले.

सुमारे 32 किलोमीटर (20 मैल) अंतरावर असलेल्या शिमाने अणुऊर्जा प्रकल्पाचे संचालन करणाऱ्या चुगोकू इलेक्ट्रिक पॉवर 9504.T, कंपनीने सांगितले की, त्यांच्या युनिट क्रमांक 2 मध्ये कामकाज नेहमीप्रमाणे सुरू आहे. जपानच्या अणुऊर्जा नियामक प्राधिकरणाने सांगितले की, भूकंपानंतर कोणतीही अनियमितता आढळली नाही.

मार्च 2011 मध्ये फुकुशिमा येथील आपत्तीनंतर जपानमधील सर्व अणुऊर्जा प्रकल्प बंद करण्यात आले होते, त्यानंतर डिसेंबर 2024 मध्ये या प्रकल्पाचे युनिट क्रमांक 2 पहिल्यांदाच पुन्हा सुरू करण्यात आले होते.

या भूकंपाची तीव्रता जपानच्या 1-7 स्केलवर ‘अप्पर-5’ होती, ज्यात आधाराशिवाय हालचाल करणे कठीण होईल इतकी तीव्र होती.

जपानमध्ये भूकंप सामान्य आहेत, कारण हा जगातील सर्वात जास्त भूकंपप्रवण क्षेत्रांपैकी एक आहे. जगातील 6 किंवा त्याहून अधिक तीव्रतेच्या भूकंपांपैकी सुमारे एक-पंचमांश भूकंप जपानमध्ये होतात.

वेस्ट जपान रेल्वे 9021.T ने सांगितले की, भूकंपाच्या पार्श्वभूमीवर त्यांनी शिन-ओसाका आणि हाकाटा दरम्यान शिंकांसेन बुलेट ट्रेनची सेवा थांबवली आहे.

आणखी भूकंपांची शक्यता 

‘द जपान टाइम्स’ने दिलेल्या वृत्तानुसार, 10 किलोमीटर खोलीवर आलेल्या सुरुवातीच्या भूकंपाचा केंद्रबिंदू शिमाने प्रांताच्या पूर्वेकडील भागात नोंदवला गेला असला तरी पश्चिम जपानच्या अनेक भागांमध्येही भूकंपाचे धक्के जाणवले, ज्यामुळे दूरचित्रवाणी प्रक्षेपण आणि मोबाईल फोनवर तातडीने सूचना देणारे संदेश प्रसारित झाले.

या वृत्तात पुढे म्हटले आहे की, जेएमएने पश्चिम तोत्तोरीमध्ये चौथ्या स्तराची दीर्घ-कालावधीची भूकंपाची हालचाल (सर्वात तीव्र श्रेणी) नोंदवली. या प्रांतात चौथ्या स्तराचा इशारा नोंदवला जाण्याची ही पहिलीच वेळ होती, आणि नोटो द्वीपकल्पावर जानेवारी 2024 मध्ये आलेल्या शक्तिशाली भूकंपापासून जारी केलेला हा पहिलाच चौथ्या स्तराचा इशारा होता. उंच इमारतींमध्ये किंवा मोठ्या पुलांवर असलेल्या लोकांना दीर्घ-कालावधीच्या भूकंपाच्या हालचालीच्या वेळी सतर्क राहण्याचा सल्ला देण्यात आला आहे, कारण या हल्ल्यांनंतर बराच काळ पुढे-मागे हालचाली करणारे हादरे बसतात, असे त्या संस्थेने सांगितले.

जेएमएने असाही इशारा दिला आहे की, पुढील आठवड्यात, आणि विशेषतः पुढील दोन किंवा तीन दिवसांत, 5 किंवा त्याहून अधिक तीव्रतेचे भूकंप येऊ शकतात.

भूकंप आणि त्सुनामी विभागाचे प्रभारी जेएमए अधिकारी अयाताका एबिता म्हणाले, “या भागात भूकंपाची क्रिया अजूनही सक्रिय आहे. 5 पेक्षा जास्त तीव्रतेचा भूकंप होण्याची शक्यता आहे, त्यामुळे कृपया सतर्क रहा.”

टीम स्ट्रॅटन्यूज
(रॉयटर्सच्या इनपुट्ससह)