सरकारी शटडाऊनचा 36 वा दिवस सुरू होत असताना, हवाई वाहतूक नियंत्रण सुरक्षा विषयक चिंतेचा मुद्दा उपस्थित करत 40 प्रमुख अमेरिकन विमानतळांवरील उड्डाणे 10 टक्क्यांनी कमी केली जातील अशी घोषणा अमेरिकेचे वाहतूक सचिव शॉन डफी यांनी बुधवारी केली.
जर डेमोक्रॅट्स सरकारचे कामकाज पुन्हा सुरू करण्यास सहमत झाले तरच ही कपात मागे घेतली जाऊ शकते असे डफी यांनी स्पष्ट केले.
अमेरिकेच्या इतिहासातील हा सर्वात मोठा शटडाऊन असून 13 हजार हवाई वाहतूक नियंत्रक आणि 50 हजार वाहतूक सुरक्षा प्रशासन एजंटना पगाराशिवाय काम करावे लागत आहे.
ट्रम्प प्रशासनाने शटडाऊन संपवण्यासाठी डेमोक्रॅट्सवर दबाव वाढवण्याचा प्रयत्न केला आहे. विमान वाहतुकीत नाट्यमय व्यत्यय येण्याची शक्यता लक्षात घेऊन त्यांना सरकारचे कामकाज पुन्हा सुरू करण्यासाठी मतदान करण्यास भाग पाडले आहे. प्रमुख आरोग्य सेवा अनुदानांबाबत वाटाघाटी करण्यास नकार दिल्याने या शटडाऊनला रिपब्लिकन जबाबदार आहेत असा डेमोक्रॅट्सचा दावा आहे.
शटडाऊनमुळे कर्मचाऱ्यांची वाढती कमतरता
हवाई वाहतूक नियंत्रण विभागात मोठ्या प्रमाणातील कर्मचाऱ्यांच्या कमतरतेमुळे शटडाऊन सुरू झाल्यापासून हजारो उड्डाणांना विलंब होत आहे. एअरलाइन्सचे म्हणणे आहे की किमान 3.2 दशलक्ष प्रवासी आधीच हवाई वाहतूक नियंत्रणाच्या कमतरतेमुळे प्रभावित झाले आहेत.
प्रमुख अमेरिकन वाहकांशी झालेल्या संभाषणात, FAA ने सांगितले की विमानतळांवरील कर्मचारी क्षमता कपात 4 टक्क्यांपासून सुरू होईल, ती शनिवारी 5 टक्के आणि रविवारी 6 टक्क्यांपर्यंत वाढेल आणि पुढील आठवड्यात ती 10 टक्क्यांपर्यंत पोहोचेल, असे उद्योग सूत्रांनी रॉयटर्सला सांगितले. FAA आंतरराष्ट्रीय उड्डाणांना कपातीतून सूट देण्याची योजना देखील आखत आहे.
हवाई वाहतूक नियंत्रकांवरचा ताण कमी करण्यासाठी हे पाऊल उचलण्यात आले आहे. FAA मध्ये अपेक्षित कर्मचाऱ्यांच्या संख्येपेक्षा सुमारे 3 हजार 500 हवाई वाहतूक नियंत्रकांची कमतरता आहे आणि अनेक जण शटडाऊनपूर्वीच अनिवार्य ओव्हरटाइम आणि आठवड्यातून सहा दिवस काम करत होते.
विमान कंपन्या कमी बुकिंगसाठी सज्ज
1 ऑक्टोबरपासून सुरू झालेल्या या बंदमुळे अनेक कमी उत्पन्न असलेल्या अमेरिकन नागरिकांना अन्न मदतीपासून वंचित राहावे लागले आहे, अनेक सरकारी सेवा बंद पडल्या असून सुमारे 7 लाख 50 हजार फेडरल कर्मचाऱ्यांना रजा द्यावी लागली आहे.
जर फेडरल सरकारचा बंद आणखी एक आठवडा चालू राहिला तर “मोठ्या प्रमाणात गोंधळ” निर्माण होऊ शकतो आणि काही राष्ट्रीय हवाई क्षेत्र हवाई वाहतुकीसाठी बंद करावे लागू शकते असा इशारा डफी यांनी मंगळवारी दिला होता.
विमान कंपन्यांनी विमान वाहतूक सुरक्षेच्या धोक्यांचा वारंवार हवाला देत शटडाऊन संपविण्याची विनंती केली आहे.
टीम स्ट्रॅटन्यूज
(रॉयटर्सच्या इनपुट्ससह)
