शुक्रवारी, अमेरिकेचे अध्यक्ष डोनाल्ड ट्रम्प यांनी, रशियाचे अध्यक्ष व्लादिमीर पुतिन आणि युक्रेनचे अध्यक्ष वोलोडिमिर झेलेन्स्की यांना युक्रेनमधील युद्ध समाप्त करण्याचे आवाहन केले आणि 30 दिवसांच्या युद्धविरामाची देखील शिफारस केली.
सोमवारी सौदी अरेबिया, संयुक्त अरब अमिरात आणि कतारच्या दौर्यावर जाणाऱ्या ट्रम्प यांना, कीवमधील अमेरिकन दूतावासाने दिलेल्या संभाव्य मोठ्या हवाई हल्ल्याच्या इशाऱ्याच्या पार्श्वभूमीवर, पुतिनसाठी काय संदेश आहे असे विचारले गेले.
ट्रम्प यांचा संदेश
“माझा दोघांसाठीही एकच संदेश आहे: हे युद्ध संपवा,” ट्रम्प यांनी युक्रेन आणि रशियाविषयी सांगितले. “हे मूर्ख युद्ध संपवा. हाच माझा संदेश आहे दोघांसाठीही,” ट्रम्प यांनी ओव्हल ऑफिसमध्ये पत्रकारांशी बोलताना सांगितले.
दूतावासाने आपल्या वेबसाइटवर म्हटले आहे की, त्यांना अशा हवाई हल्ल्याची माहिती मिळाली आहे जो येत्या काही दिवसांत कोणत्याही क्षणी होऊ शकतो.
“नेहमीप्रमाणे, एखादा हवाई इशारा मिळाल्यास अमेरिकन नागरिकांनी तात्काळ सुरक्षित ठिकाणी आश्रय घ्यायला तयार राहावे,” असे त्यात म्हटले आहे.
झेलेन्स्की यांच्याशी फलदायी संभाषण
व्हाइट हाऊसने सांगितले की ट्रम्प यांची झेलेन्स्की यांच्याशी गुरुवारी “खूप चांगली आणि फलदायी” फोनवर चर्चा झाली आणि ट्रम्प यांना आशा आहे की युक्रेन आणि रशिया पुढील आठवड्यात 30 दिवसीय युद्धविरामाच्या प्रस्तावावर सहमती देतील.
व्हाइट हाऊसच्या प्रवक्त्या कॅरोलिन लिव्हिट यांनी शुक्रवारी पत्रकार परिषदेत सांगितले की, पुढील आठवड्यात मध्य पूर्वेत ट्रम्प आणि पुतिन यांची कोणतीही बैठक होणार नाही.
कीवमध्ये, झेलेन्स्की यांच्या प्रमुख सहायक अँद्री यर्माक यांनी सांगितले की त्यांनी शुक्रवारी अमेरिकेचे परराष्ट्र मंत्री मार्को रुबियो आणि अन्य अधिकाऱ्यांशी प्रस्तावित युद्धविराम आणि शांतता कराराच्या दिशेने होणाऱ्या हालचालींचा भाग म्हणून चर्चा केली.
“प्राथमिक लक्ष युद्धविराम आणि शांतता कराराच्या शक्यतांवर होते,” असे यर्माक यांनी टेलिग्रामवर लिहिले. अमेरिकन दूत स्टीव्ह विटकॉफ आणि कीथ केलीग यांचाही या चर्चेत सहभाग होता. युक्रेनचे संरक्षण मंत्री रुस्तेम उमेरोव्ह हेही उपस्थित होते.
“आपल्या राष्ट्राध्यक्षांमध्ये जे मुद्दे ठरले आहेत, त्यांची अंमलबजावणी करणे किती महत्त्वाचे आहे, यावरही चर्चा झाली,” यर्माक यांनी नमूद केले.
टीम स्ट्रॅटन्यूज
(रॉयटर्सच्या इनपुट्सह)
