रशियाने रात्रीच्या वेळेस कीववर केलेल्या हवाई हल्ल्यात, एका स्थानिक अपार्टमेंटमधील 8 रहिवासी जखमी झाले असून, त्यामध्ये 3 वर्षांच्या एका लहान मुलाचाही समावेश आहे, अशी माहिती युक्रेनच्या राजधानीतील अधिकाऱ्यांनी सोमवारी दिली.
सोमवारी मध्यरात्री, झालेल्या या हल्ल्यात जखमी झालेल्यांपैकी 4 जणांना रुग्णालयात दाखल करण्यात आले असून, त्यापैकी एकाची प्रकृती गंभीर आहे, अशी माहिती कीवच्या लष्करी प्रशासनाचे प्रमुख टायमूर टकाचेंको यांनी टेलिग्राम अ‍ॅपवर दिली.
कीवचे महापौर विताली क्लिट्शको यांनी सांगितले की, “हे सर्व लोक शहराच्या डार्नित्स्की जिल्ह्यातील ड्निप्रो नदीच्या काठावर असलेल्या एका बहुमजली अपार्टमेंट इमारतीचे रहिवासी होते.”
“स्फोटाच्या लाटेमुळे 6 व्या मजल्यापासून ते 11 व्या मजल्यापर्यंतच्या खिडक्या फुटल्या,” असे क्लिट्शको यांनी टेलिग्रामवरील पोस्टमध्ये नमूद केले.
कीववर हवाई हल्ल्यांचे सावट
राजधानी कीव आणि युक्रेनमधील बहुतेक भागांमध्ये, युक्रेनियन हवाई दलाच्या रशियन क्षेपणास्त्र आणि ड्रोन हल्ल्यांच्या इशाऱ्यांनंतर रात्रीच्या वेळेस अनेक तास हवाई इशारे सुरू होते.
युक्रेनच्या पश्चिम सीमेवर असलेल्या पोलंडच्याजवळ क्षेपणास्त्र हल्ल्यांचा धोका लक्षात घेता- जे नाटोचे सदस्य राष्ट्र आहे, पोलीस सशस्त्र दलांनी पोलंडच्या हवाई हद्दीच्या सुरक्षिततेसाठी तातडीने विमाने उड्डाण केली.
मध्य युक्रेनमधील क्रोपीव्हनित्स्की शहरावरही हल्ला झाला, असे प्रादेशिक राज्यपाल आंद्री रायकोविच यांनी सांगितले. ते म्हणाले की आपत्कालीन सेवा घटनास्थळी कार्यरत आहेत आणि संभाव्य नुकसानीबाबतची माहिती सोमवारी नंतर दिली जाईल.
रशियाने युक्रेनवर केलेल्या या हल्ल्याचे पूर्ण स्वरूप समजू शकलेले नाही. दरम्यान, रॉयटर्सच्या साक्षीदारांनी सांगितले की, “कीव शहरात रात्रीच्या वेळी जोरदार स्फोट झाले, जे हवाई संरक्षण यंत्रणेच्या हालचालींसारखे वाटत होते.”
या हल्ल्यावर रशियाकडून अद्याप कोणतीही प्रतिक्रिया देण्यात आलेली नाही. युद्धात दोन्ही बाजूंनी नागरिकांना लक्ष्य केल्याचे नाकारले आहे, हे युद्ध रशियाने फेब्रुवारी 2022 मध्ये सुरू केले. मात्र, या संघर्षात हजारो नागरिकांचा मृत्यू झाला असून त्यातील बहुसंख्य युक्रेनियन आहेत.
दरम्यान रविवारी, युक्रेनियन ड्रोन्सनी सेंट पीटर्सबर्गवर हल्ला केला, ज्यामुळे तेथील विमानतळ 5 तासांसाठी बंद ठेवण्यात आले होते, तेव्हा रशियन राष्ट्रपती व्लादिमीर पुतिन नौदल दिनाच्या समारंभात सहभागी झाले होते, जरी नौदल परेड आधीच सुरक्षेच्या कारणास्तव रद्द करण्यात आली होती.
टीम स्ट्रॅटन्यूज
(रॉयटर्सच्या माहितीनुसार)
