“रविवारी रात्री 8 वाजता (सोमवारी 03.00 GMT), अलास्का एअरलाइन्समध्ये आयटी सेवा खंडित झाली ज्यामुळे आमच्या ऑपरेशन्सवर परिणाम होत आहे. आम्ही अलास्का आणि होरायझन एअर फ्लाइट्ससाठी तात्पुरती, सिस्टम-व्यापी ग्राउंड स्टॉपची विनंती केली आहे,” असे अलास्काने रविवारी संध्याकाळी रॉयटर्सला ईमेल केलेल्या निवेदनात म्हटले आहे.
अलास्काने तपशील जाहीर केला नाही
सिएटलस्थित एअरलाइनने सांगितले की संध्याकाळच्या संपूर्ण उर्वरित कामकाजावर याचा परिणाम होणार आहे. मात्र तो कशाप्रकारे याचा कोणताही तपशील कंपनीने दिलेला नाही.
नियमित कामकाजाच्या वेळेनंतर रॉयटर्सच्या विनंतीला FAA ने कोणताही प्रतिसाद दिला नाही.
FAA स्टेटस पेजवर अलास्काच्या मुख्य लाईन विमानाच्या ग्राउंड स्टॉप आणि होरायझनच्या ऑपरेशन्समधील निलंबनामुळे प्रभावित झालेली सर्व प्रवासस्थाने दाखवण्यात आली.
एप्रिल 2024 मध्ये, अलास्काने त्यांच्या विमानांचे वजन आणि संतुलन मोजणाऱ्या प्रणालीतील समस्येमुळे संपूर्ण ताफा जमिनीवर उभा करून ठेवला होता. अलास्का एअरलाइन्सद्वारे चालवल्या जाणाऱ्या बोईंग 737 मॅक्स 9 जेटचे दरवाजाचे पॅनल हवेत उडून गेल्यानंतर काही महिन्यांनी हा निर्णय घेण्यात आला.
अलास्का एअर ग्रुपने त्यांच्या वेबसाइटनुसार, 238 बोईंग 737 विमाने आणि 87 एम्ब्रेर 175 विमानांचा कार्यरत ताफा राखून ठेवला आहे.
जूनमध्ये, अलास्का एअर ग्रुपच्या मालकीच्या हवाईयन एअरलाइन्सने सांगितले की त्यांच्या काही आयटी सिस्टीम हॅकमुळे विस्कळीत झाल्या आहेत. अलास्का एअर ग्रुपने सांगितले की ते अजूनही त्या घटनेचा आर्थिक परिणाम निश्चित करत आहेत.
‘स्कॅटर्ड स्पायडर’
अलास्काच्या आयटीशी संबंधित समस्यांची बातमी अशा वेळी आली आहे जेव्हा टेक कंपन्या गुगल आणि पालो अल्टो नेटवर्क्सने “स्कॅटर्ड स्पायडर” या हॅकिंग ग्रुपला विमान वाहतूक क्षेत्रात रस असल्याचा इशारा दिला आहे.
कॅनडाच्या वेस्टजेट एअरलाइन्सला जूनमध्ये एका अनिर्दिष्ट सायबर घटनेचा फटका बसला होता, तर ऑस्ट्रेलियाच्या क्वांटासला जुलैमध्ये डेटा उल्लंघनाचा सामना करावा लागला होता जिथे एका सायबर हॅकरने लाखो ग्राहकांची वैयक्तिक माहिती मिळवली होती.
अलास्कामध्ये निर्माण झालेली ही समस्या रविवारी मायक्रोसॉफ्टने सरकारी एजन्सी आणि व्यवसायांद्वारे वापरल्या जाणाऱ्या त्यांच्या सर्व्हर सॉफ्टवेअरवर “सक्रिय हल्ले” झाल्याचे जे वृत्त दिले आहे त्याच्याशी संबंधित आहे का हे अद्याप स्पष्ट झालेले नाही.
हा समस्येचा मायक्रोसॉफ्टच्या घोषणेशी काही संबंध आहे की नाही यावर प्रतिक्रिया देण्याच्या विनंतीला अलास्काने त्वरित प्रतिसाद दिला नाही.
टीम स्ट्रॅटन्यूज
(रॉयटर्सच्या इनपुट्ससह)
