![](https://bharatshakti.in/wp-content/uploads/2024/03/LT-BSI-Defence.gif")
इस्रायली सैन्याने गुरूवारी रात्री, बेइत जीन या गावात रात्रीच्यावेळी छापा टाकत, लष्कराने इस्लामिक जेमाह संघटना म्हणून दावा केलेल्या, संघटनेच्या अनेक संशयित सदस्यांना अटक केली, अशी माहिती इस्रायल संरक्षण दलाने शुक्रवारी दिली.
गुप्तचर माहितीवर आधारित कारवाई
लष्कराने सांगितले की, ही कारवाई अनेक आठवड्यांपासून मिळत असलेल्या गुप्तचर माहितीच्या आधारावर करण्यात आली, ज्यात असे सूचित करण्यात आले होते की, हा दहशतवादी गट इस्रायली नागरिकांवर हल्ला करण्याची तयारी करत आहे. या माहितीच्या आधारावर, सैनिकांनी सीमावर्ती भागाजवळ संभाव्य हल्ले थांबवण्याकरिता छापा टाकला.
कारवाईदरम्यान दोन्ही बाजूंनी गोळीबार
IDF च्या मते, कारवाईदरम्यान इस्रायली सैनिकांवरही गोळीबार झाला आणि त्यांनी हवाई मदतीसह त्यांना प्रत्युत्तर दिले. या गोळीबारात तीन इस्रायली सैनिक जखमी झाले. सर्व टार्गेटेड संशयितांना ताब्यात घेण्यात आले असून, या चकमकीत अनेक अतिरेकी मारले गेले, असे सैन्याने सांगितले. पुढील धोक्यांवर लक्ष ठेवण्यासाठी आणि शत्रुत्वाची भावना बाळगणाऱ्या गटांविरुद्ध कारवाई सुरू ठेवण्यासाठी, या भागात अजूनही सैन्य तैनात आहे.
सीरियातील इस्रायली हल्ल्यांचा व्यापक संदर्भ
2025 या संपूर्ण वर्षात, इस्रायलने सीरियामध्ये, विशेषत: दमास्कसजवळच्या आणि देशाच्या दक्षिणेकडील प्रदेशात, अनेक कारवाया केल्या आहेत. इस्रायली अधिकाऱ्यांच्या म्हणण्यानुसार, या कारवायांचा उद्देश नियोजित हल्ले रोखणे आणि सीमेजवळील ड्रुझ समुदायाचे संरक्षण करणे हा आहे.
इस्रायलने आपली ही नवी कारवाई, सुरक्षा धोके निर्माण करणाऱ्या सशस्त्र गटांना लक्ष्य करून केली असल्याचे, म्हटले आहे. परंतु, सीरियन अधिकाऱ्यांनी या हल्ल्यांमध्ये वारंवार इस्रायलने त्यांच्या सैनिकांना मारल्याचा आरोप केला आहे आणि याला सार्वभौमत्वाचे उल्लंघन म्हणत, आपला निषेध नोंदवला आहे.
टीम स्ट्रॅटन्यूज
(रॉयटर्सच्या इनपुट्ससह)
